TIRANË, 23 shkurt /ATSH/ – “Delja e detit” me regji të Aldjon Matarangasit erdhi sot premierë duke mbledhur fëmijë dhe prindër skenën e Teatrit të Kukullave.
Skenari i shfaqjes për fëmijë, i shkruar nga Nelson Mulla, ka në qendër një dele, e cila është në kërkim të jetës në natyrë mes gjelbërimit, një gjë që mungon shumë në hapësirën që ne jetojmë çdo ditë.
Aventura e deles është në tre botë të ndryshme; në det, në tokë edhe në hapësirë. Nga hapësira shikohet toka, që është e shkatërruar plotësisht, sepse mungesa e gjelbërimit është e madhe.
Shfaqja erdhi për publikun e vogël nën interpretimin e aktorëve Jorida Meta, Aleksandër Grami, Elidon Alikaj, Shegushe Bebeti, Albana Sancolli, Florian Kokona, Madi Selimi dhe Ermonela Alikaj.
Kjo shfaqje përveç argëtimit i përçon fëmijëve dhe prindërve dhe mesazhe sociale në mënyrë që të mësojnë të duan natyrën. /a.a/j.p/
