Ligji për noterët, Komisioni i Ligjeve rrëzon dekretin e Presidentit

TIRANË, 4 shkurt /ATSH – I. Vata/ – Komisioni i Ligjeve në mbledhjen e sotme me votat e shumicës ka rrëzuar vendimin e Presidentit Ilir Meta për rishqyrtim të ligjit të Noterisë.

Në Komisionin e Ligjeve, përfaqësuesi ligjor i Presidentit u shpreh se ligji ka të meta që duhet të rishikohen, ndërsa misioni Euralius, shumica dhe vetë Dhoma e Noterisë kanë rrëzuar pretendimet. Opozita e ka cilësuar ligjin si klientelist.

Në Komisionin e Ligjeve, këshilltari ligjor i Presidentit Bledar Dervishi u shpreh se disa dispozita paraqesin probleme. “Tre nene paraqesin të meta që duhet të rivlerësohen nga Kuvendi. Ka mos koherencë brenda ligjit. Nuk garantohet një kosto e barabartë mes noterëve gjatë veprimtarisë së tyre. Nuk garantohen shtresat e pamundura për të marrë shërbimet e nevojshme”, tha ai.

Përfaqësuesit e Dhomës së Noterisë deklaruan se nuk jemi dakord me propozimet e Presidentit.

Nga ana e saj, Vasilika Hysi u shpreh se argumentet e Presidentit nuk qëndrojnë.

Ndërsa deputetja e LSI-së, Silva Caka tha se ligji është klientelist, pasi sigurimi, përveçse i detyrueshëm, kthehet në tender.

Po ashtu, dhe deputeti i PD-së, Enkelejd Alibeaj u shpreh se po luhet teatër hipokrit. “Keni detyruar Presidentin që në mungesë të Gjykatës Kushtetuese t’i tërheqë veshin Parlamentit edhe në çështje të teknikës legjislative”, tha ai. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.