Beqaj në Dubai: Kosova të jetë një qendër rajonale për zhvillimin e ekonomisë dixhitale

PRISHTINË, 16 janar /ATSH/ – Ministri i Inovacionit dhe Ndërmarrësisë, Besim Beqaj po prezanton Kosovën në Forumin Ekonomik, i cili po mbahet në Dubai, bën të ditur Ministria e Inovacionit dhe Ndërmarrsisë në një njoftim për media.

Beqaj para ministrit të Ekonomisë së Dubait, Sultan Bin Saed Al Mansouri dhe pjesëmarrësve tjerë foli për mundësitë që Kosova jep për zhvillimin ekonomik për Rajonin dhe më gjerë.

“Vizioni im është Kosova të jetë një qendër rajonale për zhvillimin e ekonomisë dixhitale”, deklaroi Beqaj.

Ai para homologëve arabë, përmendi arsyet pse duhet të investohet në Kosovë. “Vendndodhja Strategjike; Infrastruktura; Popullsia; Kosto të ulëta operacionale; Legjislacioni dhe Marrëveshjet; Ambienti i Biznesit në Kosovë; Stabiliteti ekonomik (PBB); Qeveria ka ndarë një sasi të konsiderueshme të investimeve direkte në sektorin privat për të stimuluar inovacionin brenda ndërmarrjeve dhe për të rritur potencialin e eksportit dhe Stabiliteti ekonomik”, tha kreu i Ministrisë së Inovacionit dhe Ndërmarrësisë.

Duke përshkruar Kosovën, si një vend me mundësi të jashtëzakonshme, ministri Beqaj ftoi investitorët nga Emiratet e Bashkuara Arabe, ta konsiderojnë Kosovën seriozisht si një mundësi për investime.

Ndër të tjera, i pari i Inovacionit dhe Ndërmarrësisë, para të pranishmëve prezantoi vendin tonë, si të veçantë në zhvillimin ekonomik, marrë parasysh se Kosova ka popullsinë më të re në Europë me 70% të popullsisë që është nën moshën 35-vjeçare.

Projekti konkret, që Beqaj prezantoi para përfaqësuesve të Emirateve të Bashkuara, ishte Parku Trajnues gjermano-kosovar, në Prizren, si një mundësi e madhe për zhvillimin ekonomik të Republikës së Kosovës, në shumë fusha.

Duke përmendur axhendën dixhitale të Komisionit Europian për Kosovën, Beqaj tha se konsideron që Republika e Kosovës është një treg tërheqës për kompanitë prodhuese dhe TIK-të.

“Unë besoj fuqishëm në zhvillimin mbarëkombëtar të sektorit të TIK-ut, si ambasador i fuqishëm ekonomik i vendit”, theksoi Beqaj.

Ai përmendi eksportin që Kosova ka bërë gjatë vitit 2018 me shërbimeve dixhitale, si një e arritur e madhe.

Po ashtu, përmendi hapat konkret që Kosova po bën për ta zhvilluar sektorin e inovacionit dhe teknologjisë, siç janë: Infrastruktura ligjore; Infrastruktura fizike; Infrastruktura financiare dhe  Paketa fiskale.

Forumi Ekonomik që po mbahet në Dubai është forum në mes të Republikës së Kosovës dhe Emirateve të Bashkuara Arabe. /KosovaPress/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.