Sipërmarrësit italianë interes për të investuar në Shqipëri

TIRANË, 8 nëntor /ATSH/ – Sipërmarrësit italianë shprehin interesin e madh për të zgjeruar tregjet e prodhimeve të tyre në Shqipëri, nëpërmjet sipërmarrjeve të përbashkëta në fushat e biodiversitetit, agrikulturës, si dhe veçanërisht të prodhimit dhe përpunimit të agrumeve.

Presidenti i Republikës, Ilir Meta zhvilloi një vizitë në kompaninë “Amarelli”, ku u takua me drejtuesit dhe anëtarët kalabrezë të Unindustria-s, anëtare e Confindustria-s në Itali.
Gjatë këtij takimi Presidenti Meta, theksoi se vizita zyrtare në Kalabri nuk do të kishte pasur kuptim pa takimin edhe me sipërmarrësit kalabrezë.

Kreu i Shtetit vuri në dukje se Italia është partneri ynë kryesor ekonomik dhe se Shqipëria ka potenciale të mëdha duke ofruar mundësi për investime në fushën e shërbimeve financiare, teknologji, energjetikë, sidomos turizëm, etj.

“Ky takim i sotëm mishëron një dimension të rëndësishëm të marrëdhënieve të shkëlqyera dhe partneritetit strategjik mes Shqipërisë dhe Italisë, atë të bashkëpunimit ekonomiko-tregtar dhe investimeve reciproke”, – tha Meta.

“Ne do t’i mbetemi mirënjohës përjetësisht popullit dhe shtetit italian për atë çfarë kanë bërë prej shekujsh për arbëreshët dhe për mikpritjen bujare prej dekadash për qindra-mijëra emigrantë shqiptarë, të cilët tashmë janë integruar plotësisht duke kontribuar në shoqërinë dhe ekonominë italiane”, – u shpreh Presidenti Meta.

“Sot pas gati 27 vitesh demokraci, vendi ka bërë progres në shumë drejtime, edhe pse aspiratat dhe pritshmëritë tona për të ndërtuar një Shqipëri europiane akoma nuk janë përmbushur”, – tha ai.

Si shqiptarë, theksoi Meta, “ndihemi mirë teksa shikojmë dhe dëgjojmë çdo ditë dhe më tepër të rinj italianë që studiojnë, punojnë dhe jetojnë në Shqipëri”.

“Janë mbi 25 mijë qytetarë italianë që kanë zgjedhur si “tokën e premtuar” të tyre Shqipërinë. Popujt dhe vendet tona nuk i bashkon vetëm Adriatiku, historia apo kultura. Ekonomia është një urë lidhëse e qenësishme, sidomos në epokën e globalizimit ku tregtia dhe biznesi nuk njohin kufijtë shtetërorë dhe barriera kulturore”, – tha Meta.

Prej më shumë se 2 dekadash, vijoi Meta, “Italia është një nga donatorët dhe partnerët tanë kryesorë tregtarë, si dhe renditet si investitori i huaj me më shumë prezencë biznesesh në Shqipëri. Megjithatë, kemi akoma shumë potencial për të rritur volumet tregtare dhe për të tërhequr më shumë investitorë italianë privatë në sektorë si energjetika, turizmi, infrastruktura dhe manifaktura, bujqësia, agroturizmi dhe industria ushqimore, apo shërbimet financiare dhe ICT-ja”.

“Shfrytëzoj rastin të përgëzoj vullnetin e qeverisë italiane për t’i dhënë “dritën jeshile” projektit të gazsjellësit Trans Adriatik Pipeline, në segmentin e territorit italian. Përtej debateve të shëndetshme që janë zhvilluar këtu gjatë viteve të fundit, TAP është një projekt me impakt gjeostrategjik për të gjithë rajonin tonë dhe për vetë sigurinë energjetike të Europës”, – tha Meta.

“Turizmi shqiptar mesa duket është “dashuria e re” e italianëve. Deri në shtator të 2018-ës, mbi 350 mijë turistë italianë kanë shijuar bukuritë e rralla të plazheve të virgjëra dhe ujërave të kristalta, të gërshetuara me malet magjepsëse dhe mbi të gjitha me një kulinari që impresionon dhe vetë italianët. Jam i sigurtë që italianët vetëm në Shqipëri mund të hanë ushqim më të mirë sesa në Itali”, – shtoi Meta.

Potenciali ynë turistik, theksoi ai, “ka nevojë për investime të konsiderueshme dhe “know-how” për zgjerimin e shpejtë të ofertës akomoduese të hoteleve dhe resorteve, sidomos për të përballuar trendin në rritje të turistëve të huaj, numri i të cilëve kaloi 5 milionë për 2017”.
Në këtë kontekst, tha ai, “dëshiroj që të ftoj sipërmarrësit e “Unindustria Calabria” të vlerësojnë këto oportunitete investimesh në turizmin shqiptar. Tashmë kemi dhe një kuadër rregullator dhe fiskal tepër stimulues, me përjashtime taksash dhe reduktime tatimesh për bizneset që investojnë në hotele me 4 dhe 5 yje”.

“Bujqësia, agroturizmi dhe industria ushqimore janë sektorë që po njohin një zhvillim të shpejtë, të cilat vitet e fundit kanë zgjuar dhe interesin e investitorëve të huaj me kapital të mesëm financiar, për shkak të potencialeve të pashfrytëzuara dhe fitimeve të kënaqshme. Aktualisht, pjesa dërmuese e kompanive italiane janë përqendruar në industrinë e lehtë apo atë tekstile (fason), si dhe në sektorin e shërbimeve të ashtuquajtura “call centers”. Padyshim, aseti më i madh atraktiv që ka Shqipëria në raport me investitorët e huaj dhe në veçanti me Italinë, nuk është barra e ulët fiskale, por fuqia e saj punëtore dhe kryesisht potenciali i të rinjve. Ne kemi një rini të miredukuar, që flasin në pjesën dërrmuese italisht dhe anglisht dhe që punojnë me paga mesatare jo më shumë se 300-400 euro. Kjo është dhe arsyeja kryesore se pse kompanitë italiane të sektorit të shërbimeve dhe ICT kanë gjetur “parajsën” e tyre në Shqipëri”, – tha Meta.

/gj.mima/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.