TIRANE, 13 shtator /ATSH/ – Strukturat e Drejtorisë Vendore të Policisë Fier, FNSH Fier dhe Komisariati i Policisë Fier kanë kryer kontrolle për kapjen e personave në kërkim, të atyre që qarkullojnë me armë zjarri apo që tentojnë të shpërndajnë lëndë narkotike.
Gjatë kontrolleve kapen dhe arrestohen në flagrancë 2 shtetas, ndalohet 1 shtetas i shpallur në kërkim dhe procedohet penalisht 1 tjetër.
Finalizohet operacioni i koduar “Porosia e fundit”.
Sekuestrohen 33 doza me lëndë narkotike kokainë, Cannabis Sativa dhe 1 armë e ftohtë. Strukturat e Drejtorisë Vendore të Policisë Fier, në kuadër të planit të masave të hartuar për “Kontrollin e territorit, parandalimin e ngjarjeve kriminale dhe kapjen e autorëve të ndryshëm të veprave penale”, në bashkëpunim me FNSH Fier dhe Komisariatin e Policisë Fier, bënë të mundur finalizimin e operacionit “Porosia e fundit”.
Si rezultat i këtij operacioni, u arrestua në flagrancë shtetasi E. S, 27 vjeç, banues në Fier.
Arrestimi i këtij shtetasi u bë pasi nga kontrolli i ushtruar në automjetin e tij tip “Ford”, në çantën e shpinës ju gjetën dhe sekuestruan në cilësinë e provës materiale 8 doza me lëndë narkotike e dyshuar Kokainë.
Gjithashtu gjatë kontrollit të banesës ju gjetën edhe 25 doza të tjera të dyshuara kokainë dhe disa doza me lëndë narkotike të dyshuara Cannabis Sativa.
Në cilësinë e provës materiale ju sekuestrua lënda narkotike, një peshore elektronike e cila shërbente për ndarjen lëndës narkotike në doza, automjeti autoveturë, tre aparate celularë, 450 euro dhe 470 mijë lekë.
Gjithashtu nga kontrollet e ushtruar në rrugë të ndryshme të qytetit të Fierit, nga Specialistët për Hetimin e Krimeve u arrestua në flagrancë edhe shtetasi F.H., 48 vjeç, banues në Fier.
Nga kontrolli që iu bë këtij shtetasi ju gjet dhe sekuestrua në cilësinë e provës materiale një armë e ftohtë (shufër metalike), në formën e shkopit të gomës.
Po në kuadër të këtyre kontrolleve, filloi procedimi penal për shtetasin A.Z., 38 vjeç, banues në Fier.
Gjatë kontrollit të një lokali në Fier, u ushtrua kontroll fizik personave që ndodheshin në lokal dhe këtij shtetasi ju gjet një sasi lënde narkotike e dyshuar Cannabis Sativa.
Po ashtu, nga specialistët për Hetimin e Krimeve në Komisariatin e Policisë Mallakastër, u ndalua shtetasi i shpallur në kërkim P.H., 27 vjeç, banues në Mallakastër.
Ndalimi këtij shtetasi u bë pasi Gjykata e Shkallës së Parë Fier e ka dënuar me 6 muaj burgim, për veprën penale “Shkatërrim i pronës”, parashikuar nga Neni 150 i Kodit Penal.
Kontrollet do të vijojnë në gjithë Qarkun e Fierit për parandalimin dhe goditjen e paligjshmërisë, me qëllim rritjen e parametrave të sigurisë.
Materialet proceduriale i kaluan Prokurorisë pranë Gjykatës së Shkallës së Parë Fier. /e.malaj/ /a.g/