Tabaku: Në Shqipëri, merr tender publik vetëm nëse ke lidhje me pushtetin

TIRANË, 28 gusht /ATSH/ – Nënkryetarja e Komisionit të Ekonomisë dhe njëkohësisht deputetja e Partisë Demokratike, Jorida Tabaku ka deklaruar sot se, “në Shqipëri, mund të fitosh një tender publik vetëm nëse je i lidhur me qeverinë”, duke iu referuar rastit të Edmond Begos, i cili sipas saj, ka ndryshuar katër apo pesë emra duke krijuar kompani nga hiçi për të fituar tendera publikë.

Sipas saj, “ky nuk është vetëm konkluzioni i Partisë Demokratike, ky është konstatim i raportit të fundit të DASH, i Gjykatës Europiane të auditimit dhe strategjisë së zgjerimit. Por kjo fatkeqësisht është dhe e vërteta e publikuar nga raportet e Agjencisë së Prokurimit Publik”.

Por, theksoi ajo, “për të përfituar një tender publik është e domosdoshme që të jesh edhe brenda rrethit familjar të Kryeministrit Rama, oligark brenda kryeministrit, ose kriminel me rekorde kriminale”.

“Firma ‘ABS’ që Partia Demokratike po denoncon sot, jo rastësisht është e lidhur me familjen e Kryeministrit, ka mundur të përfitojë 15.6 milionë euro tendera nga shtatori 2013 deri më sot. Kompania “Advanced Business Solutions” zotërohet në bashkëpronësi nga baxhanaku i kryeministrit Armand Frangu, i cili së bashku me kompaninë B360 marrin pjesë gjithmonë në të njëjtat tendera, gjithmonë duke ndarë përfitimet me njëri-tjetrin”, tha Tabaku.

Tabaku shtoi se, “si rregull për ta bërë garën në dukje të ligjshme, por nga ana tjetër është thjesht vetëm një farsë. Në tenderin e fundit të ofruar nga OSHEE me një vlerë prej 1.94 mld lekësh (të vjetër) kompania “ABS” ka pasur ofertën më të lartë dhe përsëri ka fituar. Ndërkohë që kompania “B360” sh.p.k. ka marrë pjesë në këtë tender si spektatore”.

“Jo vetëm kaq, por Partia Demokratike këtu publikon të 27 tenderat që kjo kompani ka fituar nga shtatori 2013 e deri më sot. Të gjitha këto tendera janë qoka që Kryeministri ka rezervuar nga tepsia e parave publike, për njeriun e familjes së tij. Tenderi më i fundit i marrë nga kompania e tij nga AKSH-i, ka një vlerë prej 1.56 miliardë lekësh dhe përsëri ka fituar oferta më e lartë”, – u shpreh Tabaku.

“Tenderat që i shpërndahen oligarkëve, ofiqarëve të PS-së, të inkriminuarve që mbajnë me oksigjen deputetët e mazhorancës dhe së fundi familjen e Kryeministrit, janë një provë e rëndë për krimin që po kryhet me tenderat publik në Shqipëri. Këto janë një tjetër dëshmi që provon akuzën e ngritur nga Partia Demokratike dhe faktuar edhe nga Gjykata e Auditit të Bashkimit Europian se 1 në 3 tendera jepet pa garë, 1 në 3 tendera jepet abuzivisht”, – tha Tabaku.

Jo vetëm kaq, shtoi ajo, “shembulli i kompanisë së baxhanakut të Ramës, dëshmon edhe raportimet e Departamentit Amerikan të Shtetit që thekson se “Raportet e korrupsionit në prokurimin e qeverisë janë të zakonshme.” Vetëm për vitin 2017 sipas të dhënave publike të disponueshme online nga Agjensia e Prokurimit Publik, 1281 ose 26% të tenderave të prokuruar, janë dhënë me ofertën më të lartë. Kjo i ka kushtuar buxhetit të shtetit 41 milionë euro, që mund të ishin përdorur për ndihmën ekonomike, që mund të ishin përdorur për mirëmbajtjen e të gjitha rrugëve në Shqipëri”.

Sipas saj, “prokurimet publike janë dëshmi e qartë e dështimit të turpshëm dhe vjedhjes së hapur që një qeveri e korruptuar ka prodhuar nga shtatori i vitit 2013 e deri më sot”.

“Partia Demokratike angazhohet që çdo tenderim abuziv, ta çojë përpara ligjit. Angazhohet për të ndryshuar Ligjin e Koncesioneve, Ligjin e PPP-ve dhe Ligjin e Prokurimeve, për të siguruar një garë të hapur, duke besuar se vetëm me një garë të hapur mund të çlirohet ekonomia, mund të vijnë investimet e huaja, mund të rritet punësimi. Kjo që po i ndodh sot ekonomisë është thjeshtë kapja e radhës nga Kryeministri dhe familjarët e tij”, – përfundoi deklaratën e saj deputetja Tabaku.

/gj.mima/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.