Ambasadorja Bitri: S’ka shqiptarë të lënduar nga tragjedia në Gjenovë

TIRANË, 14 gusht/ATSH/- Ambasadorja e Shqipërisë në Romë, Anila Bitri ka deklaruar se  nuk ka shqiptarë të lënduar pas shembjes së urës në rajonin e Ligurias, pavarësisht se ka shumë prej tyre që jetojnë në këtë rajon.

Zonja Bitri është shprehur se konsulli shqiptar i nderit në Liguria është në dispozicion për çdo ndihmë. “Ne kemi ndjekur me dhimbje sot ngjarjen tragjike shembjen e urës, një pikë e rëndësishme që lidh rajonin e Ligurias me rrjetin e autostradave nacionale dhe ato që lidhin Italinë më tej me Evropën. Ai është një rajon që ka një popullsi shqiptare. Nuk kemi informacion që të kemi shqiptarë të humbur apo jetë të prekura në rajon. Do të presim më tej zhvillimet, identifikimin e viktimave për të pasur informacione të tjera më të detajuara”.

Ndërkaq, ajo ka shprehur solidaritetin për këtë ngjarje të rëndë.

“Të gjithë janë të lënduar nga kjo tragjedi e rëndë. Ne po e ndjekim me vëmendje situatën dhe jemi të gatshëm për të asistuar në rast nevoje. Konsulli ynë i nderit në rajon është i gatshëm për të qenë në shërbim të qytetarëve”.

z.tosku/e.caushi/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.