Oda Amerikane fton prodhuesit kosovarë të përfitojnë nga lehtësirat tregtare me SHBA-të

PRISHTINË, 7 gusht/ATSH/- Oda Ekonomike Amerikane në Kosovë fton kompanitë prodhuese dhe përpunuese nga Kosova që të shfrytëzojnë statusin preferencial tregtar që Kosova gëzon me Shtetet e Bashkuara të Amerikës, në kuadër të të ashtuquajturit Sistem i Përgjithësuar i Preferencave (GSP) për të eksportuar produktet e tyre në SHBA.
“GSP është program tregtar i Shteteve të Bashkuara të Amerikës, i cili lejon importe të liruara nga detyrimet doganore të mallrave nga shtetet përfituese, me qëllim promovimin e rritjes ekonomike në shtetet në zhvillim. Kosova bënë pjesë në grupin e shteteve të pavarura në zhvillim, që përfitojnë nga GSP prej disa vitesh”, theksohet në njoftimin për shtyp të Odës Amerikane.
Oda Amerikane bën të ditur se “Presidenti i SHBA-së ka nënshkruar më 23 mars 2018 aktin ligjor i cili zgjat këto masa preferenciale tregtare për një numër shtetesh, përfshirë edhe Kosovën, për tri vite të tjera, respektivisht për periudhën 1 janar 2018 deri më 31 dhjetor 2020”.
GSP përfshin më shumë se 3500 produkte që listohen sipas kodeve tarifore, që mund të eksportohen në SHBA nga shtetet përfituese pa iu nënshtruar detyrimeve doganore.
Produktet e përfshira në këtë program janë të natyrave të ndryshme, duke filluar nga produktet ushqimore, ato të tekstilit, plastikës, letrës dhe shumë industri tjera, të cilat prodhuesit në Kosovë mund t’i shfrytëzojnë.
Oda Ekonomike Amerikane fton të gjitha bizneset e Kosovës të interesuara që të eksportojnë në SHBA dhe të përfitojnë nga këto lehtësime doganore që të kontaktojnë Odën Amerikane për informata më të detajuara lidhur me mundësitë e ofruara./k.s/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.