Vetting-u po pastron rrënjësisht Kushtetuesen dhe Gjykatën e Lartë

TIRANË, 31 korrik/ATSH/ – “Po pastrohen rrënjësisht Gjykata Kushtetuese dhe Gjykata e Lartë, dy gjykatat e sipërme të Shqipërisë dhe nuk mund të kishte në të njëjtën kohë edhe pastrim, edhe ndërtim. Ndërtimi është në proces”.

Kështu u shpreh Kryeministri Rama në intervistën e tij në emisionin “Përballë”, duke theksuar se këto dy gjykata pas reformimit të tyre, në kontingjent do të kenë njerëz të pastër dhe të pa inkriminuar.

“Unë kam folur lidhur me faktin që ka një kuje të përgjithshme që kemi mbetur pa Gjykatë Kushtetuese dhe pa Gjykatë të Lartë, sepse jemi në operacion. Po zhvillohet një operacion. Po pastrohen rrënjësisht Gjykata Kushtetuese dhe Gjykata e Lartë, dy gjykatat e sipërme të Shqipërisë dhe nuk mund të kishte në të njëjtën kohë edhe pastrim, edhe ndërtim. Ndërtimi është në proces. Meqë folëm për ndërtimin e Teatrit, po pastrohet sheshi i ndërtimit dhe do të ndërtohet Gjykata e re Kushtetuese dhe Gjykata e re e Lartë e pastër, me njerëz të pa inkriminuar dhe të pa zhytur në llumin e korrupsionit, si ata që tanimë janë përzënë nga pallati i Drejtësisë. Për çfarë dileme flasim? Më mirë një Gjykatë Kushtetuese dhe një Gjykatë e Lartë mbushur me llum, apo një periudhë tranzicioni për pastrimin dhe një ristart i këtyre dy gjykatave të sipërme me njerëz që e kanë kaluar skanerin e imët të Vetingut?” – theksoi Kryeministri.

/e.caushi/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.