FOTO/ Në kërkim të produktit turistik konkurrues

TIRANË, 20 qershor /ATSH/ Jugu i Shqipërisë nuk është vetëm det edhe diell, edhe pse këto janë të parat gjëra që na vijnë ndër mend kur flasim për mrekullitë e jugut. Jugu i Shqipërisë është shumë më tepër se kaq, dhe mjafton të thuash Berat, Gjirokastër, Përmet e Sarandë dhe tërheqja është e garantuar. Por, për të rritur interesin e turistëve të huaj, por edhe për të kënaqur sa më shumë pritshmëritë e vizitorëve shqiptarë nga treva të tjera, Qeveria shqiptare ka nisur projektin e zhvillimit të integruar urban dhe korridoreve turistike që do të krijojnë paketa të plota.

Berati, Gjirokastra, Përmeti dhe Saranda veç e veç kanë shumë për t’i ofruar një turisti. Por, imagjinoni çfarë ndodh po të lidhen bashkë, po të lidhen me bregdetin e mrekullueshëm të Jonit.

Disave mund t’u duket shumë e largët si mundësi.

Nuk është tamam kështu. Fondi Shqiptar i Zhvillimit prej më shumë se 1 viti është duke punuar intensivisht për të nxjerrë në pah të gjithë potencialin turistik të 4 bashkive të përmendura më sipër. Lidhja e tyre në një hapësirë të vetme turistike nëpërmjet një korridori që ofron surpriza në çdo kthesë të re mund t’i ofrojë turistit një eksperiencë që mbetet gjatë në mendje dhe në shqisa.

FSHZH po zbaton “Projektin për Zhvillimin e Integruar Urban dhe Turizmin” të financuar nga qeveria shqiptare dhe Banka Botërore. Krahas ndërhyrjeve për rehabilitimin urban, parashikohet zbatimi i një pakete investimi prej 500 mijë eurosh që ka për qëllim krijimin  10 pikave panoramike përgjatë korridorit të jugut.

Më tej, do të vazhdohet me ndërhyrje përmirësuese dhe rigjeneruese të 5 siteve turistike si: gadishulli i Porto Palermos, Ishulli i Zvërnecit dhe Laguna e Nartës, Qyteti Antik i Orikut, Syri i Kaltër dhe Ujërat Termale të Bënjës.

Nga FShZh konfirmojnë se po punohet paralelisht edhe me zhvillimin e produkteve turistike dhe me ndërhyrje rehabilituese në infrastrukturën e qendrave historike në qytetet Berat, Përmet, Gjirokastër dhe Sarandë. Qëllimi i këtij projekti kompleks është që të aktivizojë potencialin turistik aty ku deri tani ka mbetur ‘fjetur’ dhe të nxitet aty ku tashmë ka fluks turistik.

Në një rajon kaq të pasur në monumente natyrore, trashëgimi kulturore, art, kulturë dhe tradita do të identifikohen dhe zhvillohen 20 produkte turistike që më pas do të  marketohen brenda dhe jashtë vendit. Impakti i menjëhershëm që pritet është rritja e flukseve turistike ndërkombëtare dhe për rrjedhojë rritja e të ardhurave dhe vendeve të reja të punës, për t’i dhënë hov më të madh dhe më të qëndrueshëm zhvillimit ekonomik rajonal dhe kombëtar.

Analiza e tregut turistik, që është edhe hapi i parë i procesit do të paraqesë një panoramë të përgjithshme të gjendjes aktuale të turizmit në jugun e Shqipërisë me fokus në 4 bashkitë e përzgjedhura duke u fokusuar te tregu turistik, segmentet turistike, brandet ekzistuese, produktet turistike, zinxhiri i vlerës si dhe korniza institucionale ekzistuese.

Nga ky studim do marrin përgjigje pyetje të tilla si: Kush janë objektivat marketing për t’u arritur për secilën bashki? Kush është pozicionimi i veçantë në treg për secilën bashki? Cilat eksperienca ose aktivitete janë të përbashkëta në jugun e Shqipërisë? Cilat produkte turistike duhen kthyer në prioritet dhe me çfarë lloj iniciativash? Tek cilat aktivitete marketing duhet fokusuar? Si të menaxhohet në mënyrë efektive sistemi i turizmit?

Pas studimit të tregut dhe zinxhirit të tregut, hapi i radhës do të jetë hartimi i një strategjie për zhvillimin dhe marketimin e produkteve për 5 vitet e ardhshme, si dhe krijimi i modelit më të përshtatshëm për ngritjen e Organizatës së Menaxhimit të Destinatiocionit (DMO) për t’u aplikuar në zonën ku shtrihet projekti.

I gjithë procesi pritet të përfundojë në dhjetor 2018, i mbështetur nga një paketë financimi prej 314,271 Eurosh. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.