Veseli: Parlamenti Europian i gatshëm të procedojë me përkrahje për liberalizimin e vizave për Kosovën

TIRANË, 12 qershor/ATSH/ Kryetari i Kuvendit të Kosovës, Kadri Veseli, ka filluar vizitën zyrtare në Strasburg për procesin e liberalizimit të vizave për qytetarët e Kosovës.

Kryeparlamentari Veseli është pritur sot në takim të posaçëm nga Kryetari i Parlamentit Europian, Antonio Tajani, me të cilin ka diskutuar për hapat që pritet të ndërmerren gjatë muajve në vijim, për përmbylljen e procesit të liberalizimit të vizave.

Kreu i Kuvendit të Kosovës ka marrë zotimin e Kryetarit të Parlamentit Europian, se janë të gatshëm të procedojnë me vendimin e eurodeputetëve, sapo Komisioni Europian të dalë me raportin pozitiv për vizat.

“Jam i lumtur të konfirmoj pohimin e Kryetarit të Parlamentit Europian se do të kemi përkrahjen e plotë të Parlamentit Europian për liberalizimin e vizave për qytetarët tanë. Ky është një lajm shumë i mirë. Ne po presim raportin pozitiv në fund të këtij muaji, në të njëjtën kohë pastaj në Parlamentin Europian do të marrim përkrahjen e nevojshme pro lëvizjes së lirë të qytetarëve tanë. Ky është një rrugëtim në disa hallka dhe ne po sensibilizojmë të gjithë aktorët, në mënyrë që këtë vit qytetarët tanë të mund të lëvizin pa viza”, – tha Kryeparlamentari Veseli pas takimit me Kryetarin e Parlamentit Europian.

Kreu i Kuvendit të Kosovës e ka informuar kreun e Parlamentit Europian për zhvillimet politike në Kosovë dhe për reformat e nevojshme qe po ndërmarrin institucionet e Kosovës në procesin e integrimeve europiane.

Veseli tha se Kuvendi i Kosovës shqyrton me prioritet të veçantë dhe miraton të gjitha projektligjet që dalin në procesin e integrimeve dhe ka komisionin e posaçëm që trajton përputhshmërinë e të gjitha ligjeve me ligjet e Bashkimit Europian.

Kryetari Veseli falënderoi Antonio Tajani,dhe Parlamentin Europian në përgjithësi, për mbështetjen e vazhdueshme që i ka dhënë shtetit të Kosovës dhe perspektivës europiane të saj.

Kreu i Kuvendit theksoi vendosmërinë e Kosovës për të vazhduar rrugën e saj përpara në agjendën euro-atlantike, si prioritet nacional, për të cilin ekziston konsensus i plotë midis subjekteve politike.

 /KosovaPress//m.z//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.