Përcaktohen dy shkollat finaliste në kampionatin e futbollit në kryeqytet

TIRANË, 13 prill /ATSH/ – Janë përcaktuar finalistët e kampionatit mes shkollave 9-vjeçare të kryeqytetit në futboll. “Hoxha Tahsin” dhe “Lasgush Poradeci” do të luajnë në finalen e madhe të kampionatit të minifutbollit. Finalistët e parë ishin nxënësit e shkollës “Hoxha Tahsin”, që fitoi përballë “Mihal Gramenos”, kurse finalistët e dytë ata të shkollës “Lasgush Poradeci”, që mundi shkollën “Vasil Shanto”.
Qëllimi i këtij kampionati, ishte nxitja e nxënësve në ushtrimin e sporteve të ndryshme si dhe në evidentimin e fëmijëve që mund të kenë talente në sporte specifike. Një tjetër qëllim i këtij kampionati ishte dhe formimi i fëmijëve në aspektin fizik dhe mendor, si mjet për të luftuar sedentarizmin dhe për të shmangur çdo formë të shfaqjeve negative të kohës, obezitetin dhe zhvillimin e miqësive ndërmjet nxënësve duke u përfshirë në aktivitete sportive. /m.z//r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.