Lobimi i PD-së në SHBA-Balla: Thellohet skandali  i 1 milion dollarëve të Bashës

TIRANË, 6 Mars /ATSH- I. Vata/ – Thellohet rëndë skandali 1 milion dollarësh i Lulzim Bashës për llogaritë e dyshimta për lobimin në SHBA të Partisë Demokratike, deklaroi sot Sekretari i Përgjithshëm i Partisë Socialiste, Taulant Balla.

Në një postim në statusin e tij, Balla në vijim shprehet se “Lulzim dil menjëherë dhe sqaro publikun për gropën e zezë ku e paske futur Partinë Demokratike! Zbardhen lidhjet e fshehta të Lulzim Bashës dhe të Partisë Demokratike me llogari bankare të dyshimta dhe kompanive të lobimit”.

Po ashtu, Balla shton se në një artikull investigativ të tre gazetarëve zbulohen fakte konkrete ku Partia Demokratike ka ofruar pagesa të kripura për promovimin e Lulzim Bashës, në SHBA. Siç konfirmon investigimi, Lulzim Basha kishte kontraktuar një lobist republikan dhe ish-ndihmës të fushatës së Donald Trump, i cili quhej Nick Mucin. Kontrata mes Mucin dhe Partisë Demokratike është firmosur nga Lulzim Basha, për të promovuar Partinë Demokratike të Shqipërisë në muajt mars, prill dhe maj. Sipas kontratës, Muzin do të paguhej 25,000 dollarë gjatë këtij harku kohor për shërbimet që do të kryente.

Duke shpjeguar, Balla shton se “Pas pagesës Muzin kontaktoi Stephen Bannonin dhe disa zyrtarë të Shtëpisë së Bardhë në emër të Bashës dhe vendosi që Lulzim Basha të intervistohej nga Breitbart News. Në atë kohë, Shqipëria po kalonte një fushatë të hidhur politike. Për disa javë, PDSH e Bashës, e cila udhëhoqi opozitën, kishte protestuar kundër koalicionit qeverisës të kryesuar nga kryeministri Rama dhe Partia Socialiste”.

“U fol që PDSH dhe aleatët e saj do të bojkotonin zgjedhjet parlamentare të qershorit. Dukej se Shqipëria mund të shkonte në trazira serioze. PDSH ju kthye republikanëve në Uashington për ndihmë, konfirmohet në hetimin e tre gazetarëve”, shkruan Balla, duke vënë në dispozicion linkun: https://www.motherjones.com/…/how-a-russian-linked-shell-c…/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.