109-vjetori i FA, Meta: Mirënjohje për çdo burrë e grua në uniformë që ka shërbyer me sakrificë

TIRANË 4 dhjetor /ATSH-I.Vata/- Me rastin e 109-vjetorin e krijimit Forcat e Armatosura, Presidenti Ilir Meta ka shprehur mirënjohje për të gjitha ata që kontribuuan dhe kontribuojnë në ushtrinë shqiptare.

“Me shprehjen e respektit më të lartë, falenderimit dhe mirënjohjes së thellë, për çdo burrë dhe grua në uniformë, që në këto 109 vite ka shërbyer me devotshmëri dhe sakrificë sublime në mbrojtje të atdheut, pavarësisë, sovranitetit dhe sigurisë kombëtare, garantimit të lirisë, paqes e stabilitetit, në rajon dhe botë, nën Flamurin Kombëtar, u përcjell Forcave tona të Armatosura urimet më të përzemërta në Ditën e Themelimit”, shprehet Meta.

Presidenti i inkurajon për të vazhduar me përgjegjshmëri në drejtim të modernizimit, rritjes së aftësive trajnuese dhe kapaciteteve operacionale, për të qenë gjithmonë të gatshëm në përgjigje të misionit, situatave dhe sfidave që parashtron koha, si dhe detyrave, që burojnë nga Kushtetuta e Republikës së Shqipërisë dhe angazhimet në kuadër të NATO-s.

“Përshëndetje vëllazërore për familjet e ushtarakëve, burim i përhershëm frymëzimi dhe edukimi me ndjenjat më të larta patriotike! Lavdi Dëshmorëve të rënë për Atdhe dhe Flamur”, shprehet Meta.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.