Realizohet me sukses operacioni i parë në zemër në spitalin “Shefqet Ndroqi”

TIRANË, 24 nëntor/ATSH/ Në Spitalin Universitar “Shefqet Ndroqi” është realizuar me sukses operacioni i parë në zemër.

Lajmi u bë i ditur nga ministrja e Shëndetësisë dhe Mbrojtjes Sociale, Ogerta Manastirliu, e cila tha se me këtë ndërhyrje ka nisur mbarë funksionimi i qendrës së dytë të kardiokirurgjisë në spitalet publike.

“Është realizuar me sukses operacioni i parë në zemër në Spitalin Universitar “Shefqet Ndroqi”, duke nisur mbarë funksionimin e qendrës së dytë të kardiokirurgjisë të spitaleve publike. Prof. Rezar Deveja, dr. Dervish Hasi, dr. Ketjon Menkshi, dr. Marjeta Bilaj, dr. Nereisa Rushiti, për kryerjen e operacionit të parë, me mbështetjen e prof. Ilir Ohrit, prof. Arben Baboçit, prof.asc. Alma Cani dhe dr. Saimir Kuçi”, tha Manastirliu.

Shërbimi i ri i kardiokirurgjisë në spitalin universitar “Shfeqet Ndroqi” i jep një drejtim tjetër spitalit, pasi përmbyll një cikël shumë të rëndësishëm sa i përket sëmundjeve kardiologjike, ku përveç shërbimit të hemodinamikës i investuar disa vite më parë, tashmë edhe shërbimi i kardiokirurgjisë siguron të realizojë mbi 400 ndërhyrje operatore në vit.

Investimi arrin në 1 milion euro dhe në shtator do të fillojnë operacionet e para, ndërkohë që nga janari 2022 vihet në kapacitet të plotë spitali.

/k.s/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.