Pelikani kaçurrel i plagosur 3 muaj më parë, lëshohet në liqenin e Prespës së Madhe

TIRANË, 20 tetor/ATSH/ Një pelikan kaçurrel i plagosur tre muaj më parë liqenin e Ohrit, u lëshua në liqenin e Prespës së Madhe, tërësisht i shëruar.

Lajmi bëhet i ditur nga Agjencia Kombëtare e Zonave të Mbrojtura, e cila njoftoi se sot në Parkun Kombëtar të Prespës u lëshua në liri pelikani i quajtur Zaveri.

“Tre muaj pasi u gjet i plagosur në liqenin e Ohrit, pelikani kaçurrel, i quajtur Zaveri, u lëshua në liqenin e Prespës së Madhe. Që në 31 korrik, pelikani ndodhej në qendrën e rehabilitimit të shpendëve të egër në Parkun Kombëtar Divjakë-Karavasta. Agjencia Kombëtare e Zonave të Mbrojtura e ktheu këtë situatë në mundësi të re”, thuhet në njoftim.

Po ashtu bëhet e ditur se me mbështetjen e ekspertëve dhe financim të projektit të KfW “Rezerva Ndërkufitare e Biosferës Prespë” në këtë shpend emblematik u vendos një pajisje gjurmuese GPS. Tani pelikani është gati të notojë dhe fluturojë përsëri. Kjo është hera e parë në Shqipëri që këtij lloj shpendi i vendoset pajisje GPS që do të shërbejë për studime shkencore mbi habitatet natyrore të tij.

Ekspertet e biodiversitet dhe AKZM do kenë mundësinë të kryejnë studime të vazhdueshme dhe të monitorojnë habitatet e Zaverit në vitet që do të vijnë.

Emri i pelikanit Zaver përfaqëson lidhjen nëntokësore me të njëjtin emër që lidh liqenin e Prespës se Madhe me atë të Ohrit dhe ky zog përfaqëson pikërisht këtë lidhje mes dy liqeneve.

/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.