Përkujtohet në 98-vjetorin e vdekjes, miku i madh i shqiptarëve koloneli Aubrey Herbert

TIRANË, 23 shtator/ATSH/ Koloneli i nderuar dhe miku i madh i shqiptarëve Aubrey Herbert u nda nga jeta më 23 shtator 1923.
Herbert ishte një ushtar britanik, diplomat, udhëtar dhe oficer i inteligjencës i lidhur me pavarësinë e Shqipërisë. Herbert u bë një mbrojtës i pasionuar i pavarësisë së Shqipërisë, pasi kishte vizituar vendin në 1907, 1911 dhe 1913-tën.
Kontributi i tij për Shqipërinë ishte aq i vyer sa u vlerësua duke iu ofruar dy herë froni i Shqipërisë. Nga 1911 deri në vdekjen e tij ai ishte një anëtar konservator i Parlamentit Britanik. Koloneli Herbert vuajti gjatë pjesës më të madhe të jetës së tij nga shikimi i dobët dhe ishte pothuajse i verbër në moshën 40-vjeçare.
Pas vdekjes së Herbert, nëna e tij Elisabet Karnavon, dha një ndihmë të madhe për Shqipërinë duke ndihmuar në ngritjen e një biblioteke, hapjen e shumë shkollave, në emancipimin e gruas, solli ndihma në fushën e shëndetësisë etj.
Drejtoria e Përgjithshme e Arkivave publikoi sot një telegram të dërguar nga përfaqësia diplomatike shqiptare drejtuar familjes së Kolonelit Aubrey Herbert ku i shprehin ngushëllime për ndarjen nga jeta, dokument i cili ruhet në AQSH.

 

/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.