Harry dhe Meghan debutojnë në Netflix me lojërat “Invictus”

NJU-JORK, 7 prill /ATSH-ANSA/ – Princ Harry dhe bashkëshortja e tij Meghan shenjuan debutimin e tyre në Netflix me një nga kauzat më të dashura për ta, lojërat “Invictus”, një lloj Paraolimpiade, me gara në sporte të ndryshme midis veteranëve të luftës me aftësi të kufizuara të përhershme të ndodhura gjatë shërbimit ose për shkak të shërbimit.

Projekti i parë i krijuar nga shtëpia e prodhimit e çiftit, “Archewell Productions”, quhet “Zemra e Invictus”, një seri dokumentarësh që do të ndjekë atletët dhe përgatitjet e tyre për lojërat, edicioni i ardhshëm i të cilit është planifikuar për në vitin 2022, në Hagë, Holandë.

“Nga fillimi i lojërave të para “Invictus” në 2014, ne e dinim se secili garues do të jepte një kontribut të jashtëzakonshëm në mozaikun e vendosmërisë, qëndrueshmërisë dhe vendosmërisë”, tha Princi Harry në një deklaratë zyrtare.

Seriali do t’u ofrojë komuniteteve në të gjithë botën një dritare në historitë e ngritjes drejt suksesit të këtyre atletëve gjatë vitit të ardhshëm për në Holandë./ /ervo/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.