TIRANË, 26 janar/ATSH/ Investimet e kryera nga qeveria në teknologji, në ndërtimin e sistemeve të reja që ndërveprojnë me njëra-tjetrën apo në trajnimin e burimeve njerëzore, kanë ndryshuar rrënjësisht sjelljen e shtetit ndaj qytetarëve dhe biznesit.
Deri në fund të vitit 2020 u arrit që 95 % e shërbimeve të shtetit ndaj qytetarëve apo biznesit të afrohen online. E gjithë kjo punë ka bërë që qytetarët dhe bizneset ta kenë zgjidhjen e parë platformën e-Albania.
Vetëm Instituti i Sigurimeve Shoqërore ofron online 53 shërbime, duke bërë një transformim të madh, po të kemi parasysh që për një dokument duheshin mesatarisht 10 vërtetime nga zyra të tjera.
Ministrja e Financave dhe Ekonomisë, Anila Denaj publikoi sot shembullin e një ish-ushtaraku, i cili aplikoi përmes platformës e-Albania për të përfituar pensionin e tij.
“Abdullai është një ish-ushtarak dhe për 20 vjet ka shërbyer në Forcat e Armatosura. Sot, ai është në kushtet e përfitimit të pensionit dhe të suplementit të pleqërisë”, tha Denaj.
Ai aplikoi në portalin https://e-albania.al/ për të përfituar pensionin e tij të pleqërisë, duke shmangur radhët e gjata dhe ecejaket.
Ndërkohë kalimi i një pjesë të madhe të kontakteve me shtetin online kurseu çerekmilioni orë në marrëdhëniet biznes-shtet në aspektin e radhëve, pritjeve dhe zvarritjeve. Në 4-vjeçarin e ardhshëm qeveria synon që gjithçka të jetë online për biznesin, duke nisur nga marrëdhënia biznes-qeveri, biznes-biznes dhe biznes-konsumator. /r.e/
