Situata e reshjeve/ Ekonomi: Gatishmëri maksimale dhe monitorim i vazhdueshëm i situatës

TIRANË, 20 janar /ATSH/ Ministrja e Bujqësisë dhe Zhvillimit Rural, Milva Ekonomi zhvilloi sot një takim online me drejtuesit e Drejtorive Rajonale të Ujitjes dhe Kullimit (DRUK) ku në fokus të bisedës ishte menaxhimi i situatës së krijuar nga reshjet e shiut.

Ministrja Ekonomi ka informuar përfaqësuesit në takim se nga informacioni i përcjellë prej Agjencisë Kombëtare të Mbrojtjes Civile, në datat 22-26 janar pritet të rikthehen reshjet intensive të shiut.

Ajo ka kërkuar nga strukturat e drejtorive rajonale të ujitjes dhe kullimit në vend, që të jenë në gatishmëri maksimale për ti dhënë përgjigje me shpejtësi çdo situate që mund të krijohet si pasojë e reshjeve.

Ekonomi kërkoi gatishmërinë e DRUK për të monitoruar gjendjen e infrastrukturës së hidrovoreve, kanaleve të para dhe sistemin e kullimit.

Në fjalën e saj, ministrja vuri theksin tek vijimi i koordinimit shumë të mirë me aktorë të tjerë si Prefektura, OSHEE dhe Emergjencat Civile, për të bashkëpunuar me qëllim reduktimin e pasojave që mund të krijohen nga moti i keq. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.