IKMT: Akuzat pa emra e pa fakte synojnë baltosjen, ftojmë këdo të denoncojë në organet përkatëse

TIRANË, 14 janar /ATSH/ Inspektorati Kombëtar i Mbrojtjes së Territorit (IKMT) në një sqarim publik, në respekt të punës së vet dhe në shërbim të drejtësisë kërkon të qartësojë disa prononcime qytetarësh ne zonën e Unazës së Re (zona Astir), të cilët akuzojnë IKMT për marrje ryshfeti.
“Reagimi ynë nuk ka të bëjë aspak me qëndrimet e qarta politike të intervistave, por vetëm me akuzat krejtësisht të pabaza në adresë të IKMT. Janë akuza pa emra, pa fakte, pa denoncime ligjore, vetëm mediatike, që synojnë baltosjen dhe krijimin e tymnajës së thashethemeve përreth një institucioni”, thekson IKMT.
Në reagimin e tij, IKMT fton këdo qytetar, me emër, apo anonim, të denoncojë në organet përkatëse, në media, apo dhe në IKMT, personat që u kanë kërkuar ryshfet dhe secili të mbajë përgjegjësitë e tij sipas ligjit.
Por IKMT vëren me keqardhje, se punën e saj ndonjëherë edhe mbi mundësitë, jashtë orareve, vetëm për të hapur sa më shpejtë kantieret e projekteve të reja të qeverisë për vendin dhe qytetarët, përpiqen ta përdhosin me akuza të neveritshme, për të mos thënë të porositura.
“Të tilla quajmë fjalët e një zonje në media, e cila përmendte shifra “të korrupsionit”, por pa dhënë ndonjë fakt, përveç fjalëve. Zonja përmendi edhe emrin e drejtorit të Tiranës në IKMT, si personi që i ka komunikuar se duhet të lirojë shtëpinë, por në lëmshin e fjalëve pa krye e pa trup, mund të aludohej kollaj, siç edhe ndodhi nga mediat, se zyrtarët i paskëshin kërkuar shpërblim për mosprishjen e shtëpisë”, thuhet në reagimin e IKMT.
IKMT publikon dokumentin e sotëm të kallëzimit penal nga drejtori i Tiranës në IKMT, si dhe vendimin e Këshillit të Ministrave për prishjen e objektit që zonja pretendonte se mund të qëndronte në këmbë nëpërmjet ryshfetit.
IKMT siguron qytetarët se puna e saj voluminoze, në gjithë Shqipërinë, në tetë vite me radhë, nuk mund të përlyhet e as nëpërkëmbet nga askush, qofshin këta qytetarë të prekur nga punët publike, apo qytetarë të instruktuar nga dëshira a premtime politike.
/j.p/r.e/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.