Forcat e Armatosura, faktor stabiliteti anembanë botës/ SHBA vlerëson kontributin e trupave shqiptare në Gjirin Persik

TIRANË, 14 janar/ATSH-A. Fortuzi/ Forcat e Armatosura Shqiptare janë faktor stabiliteti, paqeje dhe sigurie kudo ato shërbejnë anembanë globit.

Ministri i Mbrojtjes, Niko Peleshi shprehet krenar për punën që po zhvillojnë FA-të në angazhimin e tyre në NATO, në misionin paqeruajtës në Gjirin Persik, dhe Ngushticën e Hormuzit, kundër veprimtarive të paligjshme të Iranit.

“Krenar për vlerësimin e trupave shqiptarë kudo ku ata shërbejnë anembanë globit! Falënderimi nga sekretari Pompeo konfirmon rolin e vendit tonë si një faktor stabiliteti, paqeje dhe sigurie, jo vetëm në rajon, por edhe në botë”, deklaron Peleshi.

Shtetet e Bashkuara të Amerikës kanë vlerësuar kontributin e Forcave të Armatosura Shqiptare në rritjen e sigurisë në Ngushticën e Hormuzit dhe Gjirin Persik, nga veprimet e paligjshme të Iranit.

Sekretari Amerikan i Shtetit, Michael R. Pompeo, në një publikim në faqen e tij zyrtare në “Twitter”, ka falenderuar Shqipërinë dhe vendet e tjera që marrin pjesë në garantimin e sigurisë në zonën e Gjirit Persik dhe Ngushticës së Hormuzit.

“Faleminderit Bahrein, Mbretëri e Bashkuar, Shqipëri, Lituani, Australi, Emiratet e Bashkuara Arabe dhe Arabia Saudite për mbrojtjen e një prej linjave më të rëndësishme të transportit detar në botë nga piratët iranianë të Hormuzit”, është mesazhi i publikuar nga Michale R. Pompeo, Sekretari Amerikan i Shtetit. /j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.