Transporti publik/ Ndihmë solidare 10 mijë lekë për 10 mijë të punësuarit dhe ish-të punësuarit

TIRANË, 16 dhjetor/ATSH/ Qeveria miratoi një ndihmë solidare prej 10 mijë lekësh për 10 mijë të punësuarit dhe ish-të punësuarit në vitin 2020 në subjektet e transportit publik, qytetas, ndërqytetës dhe shërbim taksi.

Drejtori i Shërbimit të Transportit Rrugor, Blendi Gonxhja bëri të ditur se fondi është vënë në dispozicion nga institucioni që ai drejton.

“Ky është një tjetër akt solidar në prag të festave të fundvitit nga DPSHTRR – MIE për sektorin e transportit rrugor të udhëtarëve. DPSHTRR vuri në dispozicion të Qeverisë Shqiptare fondin vjetor të bonusit nga realizimi i bilancit të 2019-ës si ent, duke e hequr nga vetja për t’ua shpërndarë 10 mijë individëve në prag të vitit të ri. Akti i tretë sivjet nga DPSHTRR ”, theksoi Gonxhja.

Sipas tij, ndihma solidare e miratuar me vendim të Këshillit të Ministrave është në vlerën e 10 mijë lekëve. Kjo ndihmë bëri të ditur ai, do kalojë direkt në numrat e llogarive bankare sipas listës dhe brenda dhjetorit 2020.

Po ashtu, Gonxhja informoi se u miratua gjithashtu edhe shtesa për 420 paga lufte prej 26 mijë lekësh për punonjësit dhe ish-punonjësit në subjektet e transportit publik, qytetas dhe ndërqytetës të cilët nuk mundën ta përfitonin te Paketa e Qershorit, financuar po nga DPSHTRR.

Sektori i transportit publik është një ndër më të goditurit për shkak të pandemisë së COVID-19. /r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.