TIRANË, 3 dhjetor/ATSH-Bledi Naska/ Pandemia e shkaktuar nga COVID-19 është një ngjarje botërore pa precedencë dhe me efekte shumë të rëndësishme globale jo vetëm në shëndetin e popullatës, me sëmundshmërinë e konsiderueshme dhe pasojat e saj, por dhe në ekonominë globale, në jetën sociale, politike etj.
Duke pasur parasysh këto efekte të rëndësishme, Akademia e Shkencave e Shqipërisë, e përfshirë në përpjekjet e gjithë shoqërisë shqiptare për përballimin e pandemisë, e ka ndjekur me vëmendje të veçantë dhe në mënyrë proaktive këtë pandemi, qoftë nëpërmjet aktiviteteve dhe punës ndërdisiplinare të grupeve të ndryshme të punës së saj, qoftë dhe me aktivitete dhe projekte të veçanta.
Akademia e Shkencave intensifikoi përpjekjet për realizimin e një qasjeje shkencore multidimensionale ndaj epidemisë. Një nga këto përpjekje ishte dhe forumi shkencor
“Pandemia e shkaktuar nga COVID-19 dhe përballimi i saj në Shqipëri dhe në botë”.
Ky forum shkencor shtjelloi shumë aspekte në lidhje me pandeminë: aspekte virologjike, imunologjike klinike dhe epidemiologjike, por gjithashtu edhe aspekte sociale dhe ekonomike.
Në përfundimet e veprimtarisë u përcaktuan edhe një sërë përfundimesh dhe rekomandimesh sipas fushave të ndryshme për institucionet qeveritare, të cilat mund të shërbejnë në përballimin më të mirë të situatave të vështira të shkaktuara nga COVID-19.
Akademiku Genc Sulçebe, prof. dr. Alban Ylli dhe prof. dr. Arjan Harxhi prezantuan, në kuadër të informimit të publikut, rezultatet dhe rekomandimet e grupit të punës, duke u mbështetur në katër pika thelbësore.
Mënyrat e ndjekjes dhe përballimit të ecurisë së pandemisë COVID-19, ku përfshihen shtimi i aktiviteteve testuese, gjurmimi i të infektuarve, mbështetja e punës studimore dhe kërkimore laboratorike për aspektet virologjike dhe imunologjike të infeksionit nga SARS-CoV-2 në popullatën shqiptare.
Trajtimi i sëmundjes COVID-19 në tre nivelet shëndetësore: mjekimi nga mjeku i familjes, shërbimi ambulator në kushtet e shtëpisë dhe ndihma mjekësore e specialaizuar në repartet e veçanta etj.
Masat parandaluese të përhapjes së këtij infeksioni, siç janë: dekujarimi i grumbullimeve të përsonave, ndërgjegjësimi i publikut në media lidhur me përshtatjen e sjelljeve vetjake për të ulur riskun nga infektimi, marrja e masave të rrepta për të siguruar mbajtjen e detyruar të maskave në mjedise të mbyllura dhe të jashtme publike, përshkallëzimi i aktiviteteve inspektuese për respektimin e protokolleve anti-epidemike të funksionimit të shërbimeve të tregëtisë, transportit dhe industrisë etj.
Sulçebe, gjatë trajtimit të pikave të sipërpërmendura, theksoi rëndësinë e masave për përhapjen e infeksionit, duke përmendur se gjatë muajit nëntor dhe dhjetor ka pasur një ekspasion të pandemisë. Për të parandaluar këtë dukuri në përputhje edhe me rekomandimet e raportit mbi rezultatet e forumit shkencor, duhet të gjurmohen edhe kontaktet, që të evidentohen edhe asimptomatikët.
Ai u shpreh për mediet se është shkenca ajo që po suporton intensivisht mjekësinë. Ai vuri në dukje se është për t’u përgëzuar shkenca, pasi në laboratorë u krijua në një kohë shumë të shkurtër edhe vaksina kundër këtij virusi. /j.p/r.e/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.
