Komiteti i Ekspertëve: Masat ekzistuese antiCovid mbeten në fuqi pa afat, situata dinamike


TIRANË, 2 dhjetor/ATSH/ Komiteti i Ekspertëve në mbledhjen e zhvilluar sot mori vendimin unanim për të vazhduar masat kufizuese antiCovid, të cilat do të vijojnë të mbeten në fuqi pa afat.

Kryetarja e Komitetit Teknik të Ekspertëve, prof. Mira Rakacolli, tha sot në konferencën për shtyp se “do të vijojnë të jenë të ndaluara grumbullimet me mbi 10 persona në vende të hapura e të mbyllura, mbledhjet partiake, tubimet, konferencat, ceremonitë e festave, ato martesore, ato mortore jashtë rrethit familjar, kufizimi i bareve e restoranteve fast-food nga ora 22:00-6:00 (përveç shërbimit delivery), do të vazhdojë të jetë në fuqi pa afat kufizimi i lëvizjes së qytetarëve nga ora 22:00-6:00, ku përjashtim përbëjnë emergjencat dhe arsyet e punës. Administrata do të vijojë të punojë nga shtëpia, universitetet do të vazhdojnë online. Shkollat do të vazhdojnë me mësimin e alternuar fizik dhe online”.

“Të gjitha këto masa do të jenë pa afat dhe do të analizohet situata epidemiologjike në vazhdim duke i ndjekur me shumë kujdes efikasitetin dhe tendencat e lehta pozitive që janë vënë re javën e fundit në lidhje me numrin e rasteve te reja që kanë një tendencë rënie”, – tha Rakacolli.

Zv.ministrja Rakacolli u shpreh se ” kjo situatë është dinamkie dhe nëse kjo situatë do të rëndohet mund të vlerësohen edhe masa të tjera shtesë”./k.s/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.