MEPJ: Greqia mbyll pikën e kalimit kufitar të Kapshticës, pikat e tjera kufitare mbeten të hapura

TIRANË, 19 nëntor/ATSH/Ministria për Europën dhe Punët e Jashtme informoi sot mbi vendimin e qeverisë greke për të mbyllur nga dita e nesërme pikën kufitare të Kapshticës, ndërkohë që mbeten të hapura pikat e tjera kufitare.

 

“Qeveria greke, përmes Zëdhënësit Qeveritar, Stelios Petsas, ka njoftuar në lidhje me hyrjet në rrugë tokësore të udhëtarëve drejt Greqisë, përfshirë pikat kufitare me Shqipërinë. Nga dita e nesërme, datë 20 nëntor 2020, ora 06:00 e mëngjesit, mbyllet pika kufitare në Kapshticë, ndërsa mbetet e hapur ajo në Kakavijë. Në lidhje me kufijtë e tjerë veriorë të vendit, do të mbeten të hapura pikat kufitare në Evzonoi dhe Promachona, ndërsa në Nimfea do të hyjnë vetëm kamionat”, thuhet në njoftimin e MEPJ-së.

Ministria e Jashtme njofton se “qytetarët që do të hyjnë në Greqi, përveç paraqitjes së testit negativ PCR të kryer deri në 72 orë më parë, do të kryejnë edhe rapid test nga Njësi të Sekretariatit të Përgjithshëm të Mbrojtjes Civile dhe Organizatës Kombëtare të Shëndetit Publik të Greqisë”.

“Personat që rezultojnë negativë, mund të hyjnë në vend dhe të shkojnë në destinacionin e tyre, në bazë të dokumentit PLF që do dorëzojnë. Ky vendim vlen vetëm për kufijtë tokësorë, të lartpërmendur, ndërkohë që kufijtë ajrore mbeten të hapur”, thuhet në njoftim. /m.m/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.