49 teste të reja të akredituara nga laboratori i ri, siguria ushqimore po fuqizohet dita-ditës

TIRANË, 5 korrik/ATSH/ Analizat e Sigurisë Ushqimore në vendin tonë po kryhen më në fund sipas standardeve kudo në BE.

Kryeministri Edi Rama publikoi sot një video me pamje nga laboratori i Institutit të Sigurisë Ushqimore dhe Veterinarisë (ISUV).

“49 teste të reja të akredituara, që garantojnë produktet që konsumojmë brenda vendit dhe eksportojmë në tregjet jashtë.  Siguria ushqimore po fuqizohet dita-ditës dhe do të vijojë të jetë prioriteti ynë”, – thekson Rama.

Testet e akredituara janë indikatori i matjes së besueshmërisë së rezultatit lidhur me kontrollet mbi cilësinë e produkteve dhe nënprodukteve shqiptare ose atyre të importuara.

Konkretisht këto teste të reja përfshijnë kontrollin e mbetjeve të pesticideve në produktet me origjinë bimore dhe shtazore. Përmes tyre identifikohen Histamina, Aflatoksina, Salmoneloza, Enterobakteret, metalet e ndryshme, aciditeti i vajit të ullirit etj.

Ndërkohë veç akreditimit të 49 testeve të reja, ka përfunduar së fundi edhe rikonstruksioni i plotë i Laboratorit për Analizat e Sigurisë Ushqimore në ISUV, falë një investimi rreth 33 milionë lekë të qeverisë shqiptare. Laboratori i ri është me kushte dhe standarde sipas kërkesave të Bashkimit Europian./k.s/ /a.g/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.