Durrës/ Këshilli bashkiak miraton fondin e emergjencës civile, 45 milionë lekë për situatën nga COVID-19

TIRANË, 30 mars/ATSH-A. Fortuzi/ Këshilli bashkiak i Durrësit miratoi sot fondin e emergjencës civile të Bashkisë Durrës me vlerë 45 000 000 lekë për vitin 2020. Ky fond do të shkojë për përballimin e situatës së krijuar nga COVID-19 me qëllim dhënien e ndihmave familjeve më në nevojë.

Bashkia e Durrësit njoftoi se ka zhvilluar sot mbledhjen e Këshillit Bashkiak online, ku u miratua dhe fondi i emergjencës civile.

Sipas njoftimit, deri më sot janë shpërndarë 1045 ndihma në qytet dhe në njësitë administrative Ishëm, Manzë, Sukth, Rrashbull dhe Katund i Ri. Ndihmat e para janë shpërndarë për familje që jetojnë në çadra që pas tërmetit të 26 nëntorit, familje në ndihmë ekonomike, persona me aftësi të kufizuar apo familje të pastreha si edhe të moshuarve që trajtohen në qendrën ditore sociale. Po kështu bashkia e Durrësit ka vendosur në dispozicion të qytetarëve linjën telefonike të ndihmës, lidhur me situatën nga COVID-19, ku qytetarët mund të telefonojnë nga ora 08.-13.00 nga e hëna në të diel, në numrat: 0694114040, 0694114101, 0694114100.

Në mbledhjen e këshillit bashkiak të zhvilluar online me asistencë teknike të koordinatores rajonale të projektit “Bashki të Forta” Eneida Marku, janë miratuar edhe familjet përfituese të ndihmës ekonomike nga fondi i kushtëzuar për bllok ndihmën ekonomike deri 6% dhe fondi nga të ardhurat e bashkisë, për muajin mars 2020 si edhe dhënia në përdorim, qendrës për zhvillim komunitar “Sot për të ardhmen”, të dy ambienteve, për një afat kohor 3 vjet, për t’u përdorur: “për shërbime dhe mbështetje sociale e kundër dhunës në familje dhe me bazë gjinore, për nisma në mbështetje të shërbimeve publike, arsimit, edukimit, punësimit e zhvillimit ekonomik dhe për informimin, ndërgjegjësimin, integrimin, bashkëjetesën komunitare dhe dialogun social”./j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.