​Suksesi në Beograd, O’Connell dhe Bytyqi përgëzojnë nxënësit e shkollës “Faik Konica”

PRISHTINË, 14 maj /ATSH/ – Ambasadori britanik, Ruairí O’Connell, dhe ministri i Arsimit, Shyqiri Bytyqi, do të vizitojnë shkollën fillore “Faik Konica” në Prishtinë me rastin e suksesit të treguar në garën rajonale në Beograd.

Kjo vizitë bëhet në kuadër të projektit të British Council “Shkollat e Shekullit 21”, i cili është një projekt ambicioz i financuar nga Qeveria e Mbretërisë së Bashkuar në fushën e arsimit, me qëllimin e rritjes së perspektivës në punësim duke i pajisur nxënësit me shkathtësi koduese, duke përdorur pajisjen ‘microbit’, dhe përmirësimin e praktikave në klasë, dhe duke i trajnuar mësimdhënësit e të gjitha shkollave fillore në mendimin kritik dhe zgjidhjen e problemeve.

Në Kosovë ky projekt implementohet në bashkëpunim të ngushtë me Ministrinë e Arsimit, kurse shkolla fillore “Faik Konica” ka qenë njëra nga shkollat pjesëmarrëse në fazën e parë pilot të këtij projekti.

Dy shkollat fituese nga Kosova në garën kombëtare në kodim me pajisjen ‘microbit’, “Nazim Gafurri” dhe “Faik Konica” morën pjesë në garën rajonale të organizuar në kuadër të “Samitit Dixhital në Beograd” me këtë rast shkolla “Faik Konica” fitoi vendin e dytë.

Ambasadori britanik dhe ministri i Arsimit do të vizitojnë shkollën “Faik Konica” me qëllim që t’i përgëzojnë nxënësit për suksesin e treguar. /KosovaPress/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.