Nis përzgjedhja e librave shkollorë për fëmijët e diasporës

TIRANË, 18 prill/ATSH/- Shqipëria dhe Kosova janë dakordësuar për kurrikula të përbashkëta të gjuhës shqipe dhe kulturës në diasporë ndërsa ka nisur edhe procesi i përzgjedhjes së librave shkollorë.

Ministrja e Arsimit, Sportit dhe Rinisë, Besa Shahini theksoi gjatë fjalës së mbajtur në Kuvend se, bashkëpunimi me shtetin kosovar është thelluar në çështjet e arsimit. Në lidhje me kurrikulat e përbashkëta në diasporë, ajo tha se ka nisur procesi i përzgjedhjes së librave.

“Kemi pasur bashkëpunim të thellë në ndërtimin e kurrikulave për mësimin e Gjuhës Shqipe në diasporë. Është bërë një punë e madhe ku të dy ministritë kanë bashkëpunuar bashkë për bazat mbi të cilën do të udhëhiqet mësimi i gjuhës shqipe dhe kurrikula është miratuar vitin e kaluar në pranverë, pra në vitin 2018. Tani jemi në proces të librave shkollorë që do t’iu vijnë në ndihmë fëmijëve tanë në diasporë në mënyrë që kur të mësojnë gjuhën shqipe të jenë të udhëhequr nga kurrikula të përbashkëta”, – tha Shahini.

Falë kurrikulave të përbashkëta të gjuhës shqipe dhe kulturës në diasporë, kjo e fundit do të zbërthehet në produkte mësimore, në tekste shkollore që mund të përdoren prej mësuesve shqiptarë në diasporë.

/z.tosku/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.