Punësimi i 373 ekselentëve të parë, Rama: Fytyra e re e administratës

TIRANË, 12 mars/ATSH-Maela Marini/ Punësimi në administratën publike i 373 ekselentëve të parë, sipas Kryeministrit Edi Rama, do t’i japë administratës publike një energji dhe fytyrë të re.

Kryeministri Rama zhvilloi sot një takim me 373 ekselentë fitues të Platformës “Punë të Mbarë”, të cilët tashmë janë pjesë e administratës publike.

Kryeministri u shpreh se me këtë hap, kurorëzohet një nga pikat e rëndësishme të një procesi që vazhdon, që ka të bëjë me krijimin e mundësisë reale për të gjithë më të mirët për të shërbyer në administratë.

Sipas Ramës, “nuk bëhet fjalë për punësimin vetëm për 1 vit të studentëve ekselentë, por atyre u jepet mundësia që të konfirmojnë pozicionin e punës dhe të kapërcejnë mungesën e eksperiencës në hyrjen në konkurset e administratës publike”.

“Ne kemi adaptuar një ligj tërësisht të ndërtuar me standardet e BE-së për administratën publike. Dhe ky ligj prevalon. Për të konkurruar dhe për të marrë një vend pune në administratë duhet një eksperiencë e caktuar, pasi në vendet e BE-së nuk shkon direkt nga shkolla dhe të futesh në ministri”, theksoi Rama.

Por, sipas Kryeministrit, “në kushtet tona kjo është një domosdoshmëri që administrata të fillojë të marrë sa më shumë fytyrën e ëndrrave, shpresave, ambicieve dhe meritave të më të mirëve”.

“Ata që investojnë për të pasur rezultate të larta në shkollë nuk duhet të ndjehen të përjashtuar nga mundësia për të kontribuar në një administratë që nuk është si ato të konsoliduarat në BE, por është larg së qeni ajo që duam”, tha Rama. /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.