Rehabilitohet qendra shëndetësore në “Qytetin e Nxënësve”

TIRANË, 8 mars/ATSH/-Qendra shëndetësore ”Qyteti i Nxënësve” i është nënshtruar rehabilitimit duke ofruar sot kushte të përmirësuara dhe një standard të ri shërbimi për 8900 banorët e zonës së Kombinatit, në periferi të Tiranës.
Ministrja e Shëndetësisë dhe Mbrojtjes Sociale, Ogerta Manastirliu tha se “vetëm në Tiranë ka përfunduar rehabilitimi i 14 qendrave shëndetësore, pjesë e programit të rindërtimit të 300 qendrave shëndetësore dhe ambulancave në të gjithë vendin”.
Duke u ndalur te programet parandaluese, në Ditën Ndërkombëtare të Gruas, ministrja Manastirliu bëri një ftesë për të gjitha gratë.
“Si asnjëherë më parë, programet parandaluese për mbrojtjen e shëndetit të grave janë në fokus të politikave tona shëndetësore. Ndaj sot me 8 Mars, gjej rastin të ftoj për çdo grua, të gjejë pak kohë për t’u kujdesur për shëndetin e saj. Kryeni kontrollin mjekësor bazë, testin falas për depistimin e kancerit të qafës së mitrës dhe mamografinë falas””, tha Manastirliu.
Rreth 17 mijë gra në vit, të grupmoshës 40-49 vjeç përfitojnë falas kryerjen e analizës HPV, për depistimin e një prej tumoreve më të shpeshta për gratë.
16.700 gra kanë kryer mamografinë vetëm në një vit, çka tregon për një rritje të ndërgjegjësimit, por edhe për zgjerimin e mundësisë për ta kryer atë në spitalet rajonale, ku janë instaluar 5 mamografë të rinj si dhe përmes mamografëve të lëvizshëm në të gjithë vendin. Ndërsa Kontrollin Mjekësor Bazë, në një vit e kryen 260 mijë gra.
z.tosku/j.p/
Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.