MUZIKË – Këngët e Michael Jackson hiqen nga transmetimi në disa radio

KEBEK, 6 mars /ATSH-AFP/ – Disa radio të rëndësishme të Kebekut hoqën nga transmetimi këngët e Michael Jackson pas publikimit në SHBA të një dokumentari që akuzonte këngëtarin e famshëm për akte pedofilie, njoftoi sot për median zëdhënësja e një grupi mediatik kanadez.

”Ne jemi të vëmendshëm ndaj komenteve të audiencës sonë, dhe dokumentari i publikuar të dielën në mbrëmje ngjalli reagime’’, deklaroi Christine Dicaire, zëdhënësja e Cogeco.

”Ne preferojmë të mos jemi indiferent ndaj situatës, prandaj vendosëm të hiqnin për momentin këngët nga valët e stacioneve tona.

Grupi, i cili kontrollon 22 stacione radioje në Kebek dhe një në Ontario, mori këtë vendim pas publikimit të dielën të dokumentarit “Leaving Neverland’’ në televizionin amerikan HBO. Në këtë film që zgjaste rreth 4 orë, dy burra dëshmojnë për abuzimet seksuale që ata kishin pësuar nga ana e këngëtarit për disa vite ndërsa ishin ende minorenë./ / v.b/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.