ITALI – Të paktën 4 të vdekur nga moti i keq

ROMË, 24 shkurt /ATSH/ – Të paktën katër persona kanë mbetur të vdekur nga vala e motit të keq që ka prekur pjesën më të madhe të italisë qendërjugore ku erërat shumë të fuqishme kanë shkaktuar rënie të strukturave dhe pemëve, njofton portali “skytg24”.

Në Alvito, rajoni i Lacios, rëzimi i një muri gati dy metra i lartë ka zënë katër persona, duke vrarë dy.

Në Guidonia Monteçelio, pranë Romës, një pemë e lartë goditi një makinë duke shkaktuar vdekjen e shoferit 45 vjeçar.

Ndërsa viktima e tretë është regjistruar në Kapena, pranë Romës, ku një 54 vjeçar që po përpiqej të rregullonte çatinë, për shkak të herës së fuqishme humbi ekuilibrin duke rënë nga një lartësi prej gjashtë metrash sipër djalit 14 vjeçar, i cili vdiq.

Në tërësi, forcat zjarrëfikëse kanë bërë rreth 1 500 ndërhyrje për shkak të problemeve të shkaktuara nga moti i keq. /G.S/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.