Ministri Shala urdhëron verifikimin e produkteve që tregtohen në Kosovë

PRISHTINË, 21 shkurt/ATSH/ – Ministri i Tregtisë dhe Industrisë Endrit Shala ka urdhëruar Inspektoratin e Tregut të MTI-së që në bashkëpunim me inspektoratet komunale të bëjnë inspektime intensive të tregut në Kosovë, për të verifikuar çdo dokumentacion të produkteve të importuara nga Serbia dhe BeH, por edhe nga vendet tjera dhe krahasimin e këtyre dokumenteve me produktet e ekspozuara në tregun tonë.

Qëllimi i këtij aksioni është që të bëhet verifikimi dhe sekuestrimi i secilit produkt që mund të jetë i kontrabanduar dhe tregtohet në vendit tonë.

“Unë jam i angazhuar çdo ditë, që MTI të jetë zë i bizneseve, dhe po ashtu të përmirësojmë klimën e biznesit në vendin tonë, po ashtu MTI është e obliguar që të zbatoj ligjin dhe kushtetutën e vendit tonë. Është obligim ligjor dhe kushtetues që të ndalojmë çdo lloj kontrabande, të sekuestrojmë çdo produkt për të cilin nuk dëshmohet prejardhja. Me këto veprime në po mbrojmë qenien e shtetit tonë, dhe njëkohësisht konsumatorin, rrjedhimisht qytetarin e Kosovës”, tha ministri Shala.

Sipas tij, institucionet e vendit tonë do të kenë informacione të sakta për secilin produkt që tregtohen në Kosovë.

“Inspektorati i Tregut së bashku me inspektoratet komunale janë të obliguara që në bazë të kësaj urdhërese të dërgojnë raporte javore për të gjitha të gjeturat gjatë inspektimeve në tregun e Republikës së Kosovës”, tha Shala.

Ai u ka bërë thirrje të gjithë operatorëve ekonomikë që operojnë në Republikën e Kosovës që të furnizohen me produkte, të cilat i kanë kaluar të gjitha procedurat doganore, sanitare dhe fito-sanitare para se të ekspozojnë këto produkte për konsumatorët./ KosovaPress/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.