FOTO/ Fundjava me diell mbush Vlorën me turistë nga Kosova

TIRANË, 18 shkurt/ATSH/- Vlora priti këtë fundjavë vizitorët e parë nga Kosova, të cilët vizituan destinacionet kryesore turistike të qytetit bregdetar.

Bashkia e Vlorës bën të ditur se “120 turistë nga Kosova vizituan Vlorën duke shijuar këto ditë të ngrohta me diell. Ata vizituan destinacionet kryesore si Ishullin e Sazanit, Karaburunin, Kalanë e Kaninës, Manastirin e Zvërnecit dhe së fundmi godinën e bashkisë së Vlorës”.

Gjatë vizitave të tyre në pikat turistike të qytetit ata u njohën me trashëgiminë kulturore dhe historike të Vlorës.

Ndërsa një ditë të bukur kaluan edhe në ishullin e Sazanit dhe Karaburunit, ku u mahnitën nga bukuria që natyra i ka falur kësaj zone.

Qyteti i Vlorës gjatë sezonit të kaluar turistik u kthye në një nga destinacionet më të preferuara për vizitorët vendas dhe të huaj. /k.s/ j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.