FOTO/ Vijon konkursi “Infermierë Për Shqipërinë”, Manastirliu: Punësim sipas meritës

TIRANE, 10 shkurt/ATSH/- Pas publikimit të listës së kandidatëve, në disa qytete po zhvillohet sot konkursi “Infermierë Për Shqipërinë”.

Ministrja e Shëndetësisë dhe Mbrojtjes Sociale, Ogerta Manastirliu bën të ditur se pas testimit për qarqet e veriut, aktualisht po zhvillohet konkursi për infermierë i qarqeve Elbasan, Fier, Vlorë, Korçë, Berat dhe Gjirokastër.

Manastirliu shton se  “Infermierë Për Shqipërinë”, është platformë transparente e punësimit mbi bazë meritë të infermierëve dhe profesionistëve të shkencave mjekësore teknike në sistemin shëndetësor publik.

Dy ditë më parë, Ministria e Shëndetësisë dhe Mbrojtjes Sociale publikoi listat mbi rezultatet e verifikimit të kandidatëve që kanë aplikuar dhe janë kualifikuar për të marrë pjesë në testimin që po zhvillohet për profesione të shkencave të mjekësisë, sipas profileve dhe rretheve.

Ndërkaq një ditë më parë, Ministria e Shëndetësisë bëri me dije përfundimin e konkursit për infermierët e  qarqeve Tiranë, Shkodër, Durrës, Lezhë, Kukës dhe Dibër, me rezultatet që u shpallën në kohë reale. /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.