Një tjetër lagje në kryeqytet me linjë të re ujësjellësi

TIRANË, 28 janar/ATSH/ – Një tjetër lagje në kryeqytet ka tashmë një furnizim më të mirë dhe më cilësor me ujë të pijshëm.

Bashkia e Tiranës dhe Ujësjellës Kanalizime Tiranë (UKT) bën të mundur shtrimin e një linje krejtësisht të re për furnizimin me uji në rrugën “Prokop Myzeqari” në njësinë nr. 9, çka do garantojë jo vetëm një sasi më të madhe por edhe një ujë më cilësor.

Kjo për vetë faktin se linja e reja është e përbërë nga tubacione më të mëdha dhe me material tepër cilësore, çka nuk lejon humbjet në rrjet si dhe problematikën që sillte linja e vjetër e amortizuar.

Gjithashtu UKT në kuadër të investimeve që po kryen në shumë lagje në kryeqytet ka nxjerrë nga funksionimi rrjetin e vjetër të kanalizimeve të ujërave të bardha në rrugën “Siri Kodra” në Njësinë nr. 8, duke bërë të mundur disiplinimin e administrimit të ujërave të ndotura në këtë lagje.

Të gjitha banesat e kësaj zone do të kenë akses në këtë rrjet të ri të sapo ndërtuar, duke i dhënë fund problematikave të herë pas hershme që shkaktoheshin nga linja rrjeti i vjetër.

Ndërkohë që UKT ka nisur dhe një investim madhor dhe që pritet të sjellë një epokë të re në furnizimin me uji në kryeqytet. Prej ditës ka nisur puna për shtimin e kapacitet filtrues të ujit në Bovillë dhe shumë shpejt do nisë shtrimi i një linje të re transmetimi nga Bovilla në zonat periferike të Tiranës, siç është Kashari dhe Unaza e Re./k.s/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.