Mbështetje investimeve në peshkim

TIRANË, 19 janar /ATSH/ – Qeveria ka shtuar mbështetjen adresuar investimeve në sektorin e peshkimit.

Agjencia për Zhvillimin Bujqësor dhe Rural bën të ditur se skema kombëtare mbështeti  vitin e kaluar aplikimet për ngritjen e ambienteve të grumbullimit dhe ruajtjes frigoriferike për prodhime peshkore dhe akuakulturën, në vlerën 20 000 000 lekë për një subjekt.

Ndërkohë që aplikimi nga Organizatat e Menaxhimit të Peshkimit për linjat për filetimin, tharjen, tymosjen e produkteve peshkore nga liqenet, u mbështet në vlerën 3 000 000 lekë.

Gjithashtu, njofton AZHBR, mbështetje deri në 70% të vlerës, por jo më shumë se 20 000 000 lekë u dhanë edhe për instalimin e bankinave lundruese, nga Organizatat e Menaxhimit të Peshkimit.

Peshkimi vijon të jetë në prioritet të politikave mbështetëse të qeverisë edhe për vitin 2019, njofton AZHBR. /e.xh//m.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.