Valset vjeneze sonte për publikun në atmosferën e festave

TIRANË, 28 dhjetor /ATSH/ – Artistët e Teatri të Operës dhe Baletit vijnë këtë mbrëmje me grand gala “Alles Walzer” në skenën e Pallatit të Kongreseve.

Mbrëmja vjen me një program të larmishëm, që prezanton forma të ndryshme të baletit (klasik, neoklasik dhe modern) dhe koreografitë e koreografit Renato Zanella, që bashkëpunon prej shumë vitesh me Vjenën.

Teatri i Operës dhe Baletit bën të ditur se Strauss dhe të tjerë kompozitorë vjenezë vijnë  në programin artistik. “Strauss dhe autorë të tjerë vjeneze, të cilët kanë luajtur rol të rëndësishëm në historinë e operës ndër vite, vijnë për ju në grand gala “Alles Walzer””.

Ansambli i kërcimtarëve përbëhet nga balerinë të Teatrit të Operës dhe Baletit, si dhe nga solistë të tjerë që do të interpretojnë para publikut në mbrëmje me valsin vjenez. Në këtë mbrëmje do të prezantohen pjesë nga repertori muzikor i Mozart, Strauss dhe Lehar, në mënyrë që viti simbolik i marrëdhënieve mes Austrisë dhe Shqipërisë të mbyllet në një atmosferë të gëzuar vjeneze. Grand gala “Alles Walzer” ka sjellë në Tiranë dhe dirigjentin Claudio Bushler.

Grand gala “Alles Walzer” përmbyll kalendarin e shfaqjeve për vitin 2018 si dhe vitin kulturor Austri- Shqipëri.

Balloja vjeneze daton si traditë që në shekullin XIV dhe arriti majën e shkëlqimit gjatë Kongresit të Vjenës, kongresi në të cilën morën pjesë gjithë shtetet dhe fuqitë europiane në përpjekje për të arritur një marrëveshje për një rend të ri në kontinentin e vjetër. Shtrati vjenez i përket shumë viteve më parë. Në një situatë që s’ka të ngjarë me Vjenën e sotme. Filli i tyre nis nga pjesë të shkurtra të muzikës qytetare të titulluara “lingler”.

Karakteri i tyre popullor, bënte që ato të ekzekutoheshin në restorante tipike vjeneze. Një ambient i tillë ishte vatër e gëzimit, ku nuk mund të mungonte muzika. Ishin pikërisht orkestrat e thjeshta vjeneze që luanin natyrshëm dhe pa partitura këto pjesë. Pjesë e këtyre familjeve ishte edhe ajo e Shtrausit, e cila këtë traditë e çoi më përpara. Këtu filloi edhe kultivimi i kësaj muzike. Sot më shumë se 400 ballo organizohen çdo vit në Vjenë me një numër vizitorësh më të madh se 500.000 vetë. /a.a/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.