Haradinaj: Do të ishte lajm i mirë nëse liberalizimi i vizave ndodhë para festave të fundvitit

47

PRISHTINË, 9 nëntor /ATSH/ – Kryeministri i Kosovës Ramush Haradinaj tha sot se do të ishte lajm i mirë që edhe Kosova të marrë liberalizimin e vizave para festave të fundvitit.

I pranishëm në promovimin e programit nacional për rininë, Haradinaj tha se rinia e Kosovës nuk është më pak e zot se sa rinia e vendeve të tjera dhe se qeveria, sipas tij, do t’i japë përkrahje.

“Qeveria i ka marrë përgjegjësitë e veta e kemi rritur 12% buxhetin për arsim, njëkohësisht i kemi trajtuar me prioritet çështjet e arsimit. Ne i gëzohemi kësaj pune që po bëhet, vërtet na ka mobilizuar dhe do t’i japim çdo përkrahje në këtë proces. Ju siguroj që nuk jemi më pak të zot se rinia e vendeve tjera, rinia jonë duhet vetëm të ketë një nxitje. Është tepër me rëndësi që shtetet e BE-së ta vendosin në axhendë. Do të ishte një lajm i mirë që edhe Kosova të marrë liberalizimin e vizave para festave të fundvitit”, – tha  Haradinaj.

Ndërsa Kryetari i Kuvendit, Kadri Veseli tha se rinia e Kosovës është më e izoluara në Ballkan pasi që nuk ka liberalizim.

Veseli përsëriti se nëse nuk BE nuk vendos në favor të këtij procesi është racizëm.

“Rinia jonë aktualisht është duke u përballur me sfida që janë të fushave të ndryshme. Në të njëjtën kohë ballafaqohet me atë se është rinia më e izoluar në Ballkan. Po presim si do të vendoset për këtë rini, nëse nuk ka liberalizim është racizëm, presim të shohim a do t’i japë mundësi që kjo rini ta shohë botën si çdo rini tjetër, pasi që është rini europiane. Ne duhet të bëjmë më shumë për përgatitjen e tyre për tregun e punës”, – tha Veseli.

Koordinatori nacional për Kulturë, Rini dhe Sport, Rexhep Hoti, tha se me këtë program është formësuar ideja e pjesës praktike të sistemit të nxënies, që u garanton pjesëmarrje të gjithë nxënësve në tri fusha, si në dituri, në kreativitet kulturor dhe mëndim kritik dhe në sport.

Ai tha se ky projekt nuk do të ishte i plotë po të mos ishte edhe pjesëmarrja e të gjitha komuniteteve.

“Nxënësit me këtë projekt do ta kenë hapësirën e tyre për ta marrë nxënien në mënyrë normale dhe për të pasur mundësinë e një gare me bashkëmoshatarët. Pos dy dokumenteve bazë programin nacional për rininë dhe programi ndërshtetëror për rini, është edhe mundësia e bashkëpunimit”, – tha ai. /KosovaPress/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.