Misioni faktmbledhës për projektin “Parandalimi i ndotjes detare”

99

 

TIRANE, 14 shtator /ATSH/ – Portin e Durrësit e vizitoi një mision i zgjeruar i PNUD dhe konsulencës kroate ATRAC, në vijim të zbatimit të projektit për parandalimin e ndotjes detare, financuar nga Qeveria e Kroacisë.

Ceremonia e çeljes dhe e prezantimit të këtij projekti u zhvillua dy muaj më parë në ambientet e portit të Durrësit, në prani të Presidentes së Kroacisë, Kolinda Grabar Kitaroviç.

Misioni faktmbledhës që u prit nga Blerina Hasani, drejtore e Drejtorisë së Mjedisit, Sigurimit Teknik, Mbrojtjes së Shëndetit dhe Emergjencave dhe një grup specialistësh portualë, trajtoi disa nga shqetësimet e konstatuara edhe në porte të tjerë të rajonit. 

Violeta Zuna, koordinatore e projektit për PNUD dhe Vedran Martiniç, drejtor i ATRAC, u interesuan veçanërisht për mënyrën se si funksionon monitorimi mjedisor, për parandalimin e ndotjeve detare, si dhe problematikat e vërejtura në portin më të madh të vendit tonë. 

Organizata PNUD, ATRAC bashkë me portin e Durrësit do të monitorojë edhe portet e tjerë të vendit si dhe disa nga pikat e nxehta që paraqesin dhe mbartin edhe riskun kryesor të ndotjes detare.

Projekti synon trajtimin e çështjeve që lidhen me parandalimin e ndotjes detare, vlerësimin e rriskut, planin e kontigjencës dhe sistemet e reagimit dhe emergjencës. 
Porti i Durrësit nisi të ndryshojë mënyrën dhe konceptin e drejtimit 15 vjet më parë, në vitin 2003, kur Kuvendi i Republikës së Shqipërisë miratoi propozimin e Këshillit të Ministrave për Autoritetin Portual. /e.malaj/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.