Thirrja e II për grante konkurruese në pylltari zgjat deri në 10 shtator

TIRANË, 3 Shtator /ATSH/- Agjencia për Zhvillim Bujqësor dhe Rural dhe Projekti i Shërbimeve Mjedisore kanë hapur thirrjen e II për grante konkurruese për “Zhvillimin dhe Mbrojtjen e Pyjeve”, dhe të interesuarit mund të aplikojnë për të përfituar fonde për projektet e tyre deri më datën 10 shtator 2018.

Përfituesit potencialë në këtë projekt janë Shoqatat e Përdoruesve të Pyjeve dhe Kullotave dhe individë fermerë.

Në kuadër të fushatës së informimit, një ekip i përbashkët i AZHBR dhe Ministrisë së Turizmit dhe Mjedisit/Projekti i Shërbimeve Mjedisore kanë organizuar disa takime me Shoqatat e Përdoruesve të Pyjeve dhe Kullotave dhe individë fermerë, në lidhje me kriteret e përfitimit, procedurat e detajuara për zbatimin e kësaj mase me sukses.

Fushata e informimit ka përfshirë disa bashki në vend: Tiranë, Elbasan, Pogradec, Ersekë, Korçë, Lezhë, Krujë, Berat, Malësi e Madhe, Gjirokastër, Kukës, Pukë, Vlorë, Mat dhe Dibër.

“Masa për Zhvillimin dhe Mbrojtjen e Pyjeve” është një masë e re, e cila po zbatohet sipas procedurave IPARD-Like, duke pasur si qëllim realizimin e investimeve, ngritjen e kapaciteteve të Shoqatave të Përdoruesve të Pyjeve dhe Kullotave dhe fermerëve të tjerë privatë, por edhe rritjen e ndërgjegjësimit të tyre për mundësinë e thithjes së fondeve edhe përtej jetës së projektit.

Në dallim nga thirrja e parë, do të ketë një alokim të buxhetit në dispozicion për këtë thirrje, ku 70% e fondit do të shkojë në favor të aktiviteteve të pyllëzimit për të qenë në koherencë me vizionin e qeverisë për të shtuar sipërfaqet e gjelbra, dhe 30% e fondit për aktivitete si: masat parandaluese ndaj fenomeneve të erozionit, lera uji për bagëtinë, etj. Aplikantët që propozojnë aktivitete pyllëzimi do të kenë më shumë mundësi të shpallen fitues, sepse shihet si një aktivitet favorizues dhe i rendit këta aplikantë në pozita shumë të favorshme.

Thirrja e II për grante e shpallur më 20 korrik do të qëndrojë e hapur deri në 10 shtator 2018. Dosjet e projektpropozimeve do të dorëzohen pranë zyrave qendrore të AZHBR-së. /e.xh/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.