Delvinë, xhamia e Gjin Aleksit, perlë e arkitekturës dhe trashëgimisë

TIRANË, 20 gusht /ATSH/ – Po rikthehet në identitet një prej monumenteve më të rëndësishëm të kulturës islame në jug të Shqipërisë.

Vijon puna në Xhaminë e Gjin Aleksit, Delvinë për t’i rikthyer shkëlqimin që meriton e për ta shndërruar në destinacion turistik të denjë për turistët vendas dhe të huaj që së fundmi monumentet e trashëgimisë kulturore të vendit tonë i kanë kthyer në atraksione të preferuar gjatë këtij sezoni veror.

Xhamia e Gjin Aleksit është një perlë e arkitekturës por edhe e trashëgimisë sonë kulturore, për nga stili, shtresëzimet kulturore, pikturat murale dhe historia e saj – një dëshmi e vërtetë e bashkëjetesës kulturore dhe fetare të shqiptarëve.

Ajo ndodhet në fshatin Rusan të Delvinës dhe është ndërtuar rreth viteve 1600 mbi rrënojat e një manastiri me stil bizantin.

Objekti është monument kulture i kategorisë së parë. Është një nga objektet që përmban gërshetim kulturash që nga ajo vendase, në atë postbizantine, e deri otomane. Kjo xhami ka qënë e famshme për akustikën e saj të veçantë. /a.a/j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.