Opozita këmbëngul për transparencë për teatrin

TIRANË, 13 korrik /ATSH- I. Vata/ – Partia Demokratike akuzoi sot qeverinë se për shembjen e teatrit ka një plan të mirëmenduar me qëllimin për të ndërtuar 6 kulla në zonën e Teatrit.

Në një deklaratë për mediat, Kryetarja e Komisionit të Kulturës, Albana Vokshi shprehu këmbënguljen e opozitës për transparencë.

Duke iu referuar qëndrimeve për teatrin, Vokshi akuzoi kryetarin e Bashkisë së Tiranës Erion Veliajn si vendimitar për ekzekutimin e vendimit të shembjes së teatrit.

“Me zgjedhjen e Erion Veliajt në krye të Bashkisë së Tiranës, kryeministri vendosi ekzekutimin përfundimtar të planit mafioz për shembjen e Teatrit dhe betonizimit të Qendrës Historike të Tiranës”, tha Vokshi.

Në fund, Vokshi u shpreh se “transparenca jonë do të vazhdojë me këmbëngulje, pavarësisht tendencës së mediave kryesore në vend për të censuruar opozitën! ”./m.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.