Presidenti Meta i uron fitoren presidentit të Turqisë Erdoğan

TIRANË, 25 qershor /ATSH- I. Vata/ – Presidenti i Republikës së Shqipërisë Ilir Meta  i ka dërguar sot një mesazh urimi presidentit të Turqisë, Recep Tayyip Erdoğan për fitoren në zgjedhet e djeshme presidenciale.

Në mesazhin e tij, kreu i shtetit shqiptar, Meta pasi shpreh urimet për fitoren në zgjedhjet e djeshme presidenciale i uron suksese në përmbushjen e agjendës dhe zhvillimin e mëtejshëm të Turqisë dhe forcimit të marrëdhënieve mes dy vendeve, Shqipëri-Turqi.

“Urimet më të mira e të përzemërta për fitoren në zgjedhjet e djeshme presidenciale! Ju uroj nga zemra shumë suksese në përmbushjen e agjendës Suaj dhe drejtimin e zhvillimin e mëtejshëm të Turqisë e të popullit mik turk. Shpreh besimin e palëkundur se, gjatë mandatit Tuaj të ri, marrëdhëniet historike e tradicionalisht miqësore e vëllazërore midis dy vendeve e dy popujve tanë, do të forcohen edhe më shumë.”

Më tej, presidenti Meta në mesazhin e tij pohon se “jam i sigurt se, falë vëmendjes së madhe e të veçantë që i kushtoni bashkëpunimit me Shqipërinë, këto marrëdhënie do të intensifikohen e do të thellohen edhe më shumë. Ju siguroj për vullnetin dhe gatishmërinë time për të vijuar bashkëpunimin me Ju e për t’i çuar më tej këto marrëdhënie”.

Po ashtu Meta shton se: “Përfitoj nga rasti të shpreh mirënjohjen e thellë për ndihmën dhe mbështetjen e pakursyer që Ju dhe Turqia i keni dhënë Shqipërisë dhe shqiptarëve ndër vite. Shqiptarët janë mirënjohës dhe do të jenë solidarë me Ju dhe popullin mik turk në luftën kundër terrorizmit dhe ekstremizmit të dhunshëm që kërcënon paqen dhe stabilitetin e Turqisë. Me urimet më të mira për shëndetin dhe lumturinë Tuaj, ju lutem pranoni, Zoti President, shprehjen e konsideratës sime më të lartë”. /j.p/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.