FOTO/ Nis rikonstruksioni i autostradës Tiranë-Durrës

553

TIRANE, 11 qershor/ATSH/-Autostrada Tiranë-Durrës nga sot po i nënshtrohet një ndërhyrjeje emergjente për riparimin e shtresave të asfaltit në aksin Qafë Kashar – Durrës dhe Durrës – Qafë Kashar.

Ndërhyrja për gjithë autostradën në dy senset do të realizohet gjatë muajit qershor. Ditën e sotme Ministria e Infrastrukturës dhe Energjisë njoftoi nisjen e ndërhyrjes në segmentin e parë Qafë Kashar – Vorë.

Nga ana e Autoritetit Rrugor Shqiptar dhe Policisë Rrugore është hartuar një plan operacional i ndërhyrjes dhe devijimit të trafikut për të shmangur bllokimin e qarkullimit dhe garantuar mbarëvajtjen e punës në terren.

Gjatë ditës së sotme dhe të martën do të bllokohet dhe kryhet ndërhyrja në segmentin e parë nga Qafë Kashari në drejtim të Vorës.

ARRSH dhe Policia Rrugore u kërkojnë drejtuesve të mjeteve të rënda që do të lëvizin në drejtim të veriut duhet të kalojnë përmes Kamzës nga rreth rrotullimi Casa Italia.
Autoveturat që shkojnë në drejtim të Durrësit do të përdorin daljen tek pika e furnizimit Kastrati dhe mbikalimin për Kashar në drejtim të Vorës.

Drejtuesit e mjeteve që kanë si destinacion jugun, duhet të përdorin drejtimin nga Elbasani si dhe kthimin për Tiranë të përdorin sërish drejtimin nga Elbasani.

Mjetet me kalim nga Rinasi drejt Durrësit duhet të përdorin rrugën dytësore Qafë Kashar-Vorë (300 m përpara mbikalimit të Kasharit) ose në drejtim të aksit Rinas-Vorë në drejtim të doganës.

Në mënyrë të veçantë drejtuesit e mjeteve që përdorin segmentin Tiranë-Durrës dhe kthim duhet të përpiqen të zgjedhin drejtime alternative sipas udhëzimeve që do të jepen në vazhdimësi nga Autoriteti Rrugor Shqiptar dhe Policia Rrugore.

Punonjësit e Autoritetit Rrugor Shqiptar, Policisë Rrugore dhe firmave të mirëmbajtjes do të jenë me njësi të përqendruara në terren për mbarëvajtjen e ndërhyrjes dhe orientimin e trafikut.

Ju kërkohet drejtuesve të mjeteve që të respektojnë në mënyrë rigoroze rregullat e qarkullimit rrugor, sinjalistikën provizore të vendosur në segmentet ku do të punohet dhe udhëzimet e policisë.

Pas përfundimit të ndërhyrjes në segmentin Qafë Kashar – Vorë do të fillojë ndërhyrja në segmentet e tjera për të cilat ARRSH dhe Policia Rrugore do të përditësojnë skemat e lëvizjes dhe informojnë opinionin publik.

Në këtë ndërhyrje do të riparohen shtresat në pjesët e dëmtuara dhe jo e gjithë gjatësia e rrugës. Gjithsej janë 31 mijë metra katrore shtresa asfaltike. Kostoja e kësaj ndërhyrjeje llogaritet 615 mije euro dhe financimi është nga fondet e Bankës Botërore në kuadër të projektit të mirëmbajtjes si ndërhyrje emergjente ku mbi 90% e zë drejtimi i lëvizjes nga Tirana në Durrës.

Për rehabilitimin e plotë të të gjithë segmentit po punohet nga ARRSH për sigurimin e fondit nga buxheti i shtetit.

/a.gjonaj/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.