GREQI – Kotzias: Ka ardhur koha për një përgjigje të madhe për çështjen e emrit

ATHINË, 5 qershor /ATSH-MIA/ – Mendoj se po vjen momenti të themi “po”-në ose “jo”-në e madhe, ndërkohë që ti kupton vështirësitë që gjenden para teje, tha në një intervistë për televizionin shtetëror grek, ERT, ministri i Punëve të Jashtme të Greqisë, Nikos Kotzias, lidhur me ngjarjet e fundit në bisedimet greko-maqedonase për çështjen e emrit.

“Mendoj se lidershipi i vendit tonë mik në veri, ka kuptuar vështirësitë e mëdha që ekzistojnë për zbatimin e një marrëveshjeje për emrin dhe kjo gjë ka luajtur rol për ta rishikuar këtë marrëveshje, të bisedojë për sqarime të caktuara për vetë marrëveshjen, ndërkohë që jam i bindur se për disa ditë kjo do të tejkalohet”, tha Kotzias.

Ministri grek nuk zbuloi se për cilin emër palët kanë rënë dakord pasi “këtë do të duhet ta publikojnë dy qeveritë, respektivisht dy kryeministrat”.

”Ka tri variante që janë ‘Republika e Maqedonisë Veriore’, ‘Republika e Maqedonisë së Epërme’, dhe “Republika e Maqedonisë së Re’, pasi ‘Republika e Maqedonisë (Shkup)’ u hodh poshtë nga pala greke, ndërsa ‘Republika e Maqedonisë së Vardarit’, nga pala maqedonase”, theksoi Kotzias./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.