Buffon akord me PSG, por pritet vendimi i UEFA

TIRANË, 30 Maj/ATSH/ -Gianluigi Buffon i ka thënë po Paris Saint Germain dhe ka gjetur akordin me drejtuesit e klubit francez për një kontratë 2-vjeçare nga e cila pritet të përfitojë 8 milionë euro në sezon.

Edhe pse marrëveshja mes palëve është arritur prej disa ditësh, ai nuk mund të zyrtarizohet ende për faktin se Buffon është në pritje të përgjigjes së UEFA-s, nëse do të skualifikohet ose jo për reagimin e ashpër që pati ndaj gjyqtarit Oliver në fund të sfidës ndaj Realit të Madridit në Champions League.

Nëse bëhet realitet frika më e madhe e Buffon që është një dënim ekzemplar nga ana e UEFA-s atëherë kalimi i tij tek Paris Saint Germain mund të dështojë pasi 40-vjeçari italian po transferohet në Francë me një objektiv të vetëm të provojë sërish për të fituar trofeun e UEFA Champions League, këtë herë me fanellën e PSG pasi me atë të Juves nuk ia doli dot.

/gj.m/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.