Veseli: Ia jap të gjitha postet LDK-së vetëm të ketë konsensus për çështje të mëdha

126

PRISHTINE, 25 Prill/ATSH/- Kryeministri i Kosovës, Ramush Haradinaj, tha se është vështirë të flasë për 10 vitet e ardhshme të vendit tonë.  “Por, ajo që dihet është përcaktimi ynë, Kosova është euroatlantike. Ne e dimë që jemi vend euroatlantik se synojmë të jemi në BE dhe në NATO”, tha Haradinaj.

Ai tha se beson që në fund të këtij viti, Kosova e fiton një të drejtë që është liberalizimi i vizave. Në fund të këtij viti mund të jemi kandidat për statusin e kandidatit në BE.

Sipas tij, BE nuk  është aq e vendosur në qasjen e vet ndaj kësaj pjese të Evropës.

Ndërsa kryetari i Kuvendit Kadri Veseli, tha se duhet të pajtohen për çështjet që kanë interes për qytetarët.

“Ne mund të konstatojmë se Kosova ka bërë hapa të progresit të cilat në një vështrim  të një njeriu që nuk ka qëndruar në Kosovë janë shumë të mëdha”, tha Veseli në konferencën “Dekada e ardhshme e Kosovës”.

Ai tha se kanë harxhuar tri vjet me  tema të cilat duhej të ishin tema të konsensusit nacional.

“Sot iu kemi përgjigjur ftesës së LDK për tryezën për të dëshmuar që nuk është garë për ide, nëse doni zgjedhje shkojmë nesër vetëm të kemi konsensus. Preokupim është agjenda evropiane. Liberalizimi i vizave, çështja e ushtrisë, çështje që kërkon konsensus është Asociacioni, dialogu me Serbinë. Ky  shtet duhet të vendos a duhet të orientohemi në një shtet që e eviton konfliktin, apo do të orientohet në tema që do ti prijë konfliktit. Unë mund të dal në opozitë dhe të hyj në koalicion, LDK-së ia jap kryetarin e Kuvendit dhe të gjitha, e rëndësishme sot është që ky shtet duhet ta përmbyllë procesin politik me shtetin serb në mënyrë që të mos ti lërë probleme gjeneratave të reja. E kemi bërë një hap shumë të rëndësishëm me ratifikimin e demarkacionin. Duhet të bashkëbisedojmë të marrim përgjegjësi”, tha Veseli./KosovaPress/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.